Dolly Parton, tónlistarkona með meiru, birti myndband á samfélagsmiðlum í gær, þar sem hún tilkynnti að hún væri að fá bóluefni við kórónuveirunni. Var Parton síðan sprautuð með eigin meðali, bókstaflega. Eins og komið hefur fram í fréttum þá styrkti Parton lyfjafyrirtækið Moderna í rannsóknum og framleiðslu fyrirtækisins á COVID-19 bóluefni. Nam framlag Parton einni milljón dollara eða um 127 milljónum íslenskra króna.
Parton sló á létta strengi við bólusetninguna, og sagðist vera nógu gömul og nógu klár til að láta bólusetja sig. Sagðist hún ekki hafa viljað fá bólusetninguna fyrr þó hún hafi tekið þátt í að fjármagna bóluefnið því hún hafi alls ekki viljað fara fram fyrir röðina. Parton sem er orðin 75 ára var sprautuð með bóluefninu á Vanderbilt-háskólasjúkrahúsinu í Nashville í Tennessee.
„Vinsamlegast ekki hika!“ sagði hún og brast í söng með nýjan texta við eitt þekktasta lag sitt, Jolene. „Bóluefni, bóluefni, bóluefni, ég bið ykkur ekki hika. Því þegar þið eruð dauð er það aðeins of seint,” sagði hún og hló.
Parton tók fram að þó hún slægi á létta strengi, væri hins vegar um alvöru að ræða og hvatti hún áhorfendur til að láta bólusetja sig.
„Við ykkur gungurnar segi ég: Ekki vera svona miklir kjúklingar. Drífið ykkur og nælið ykkur í sprautu!“
