Píeta færð 1 milljón í minningu Bjössa Biogen: „Hafði ómet­an­leg áhrif á mig sem tón­list­ar­mann“

Efnisorð

Deila

- Auglýsing -

Sigurbjörn Þorgrímsson, Bjössi Biogen, tónlistarmaður, hefði orðið 45 ára í dag. Sigurbjörn féll fyrir eigin hendi 7. febrúar 2011 eftir langa baráttu við geðhvarfasýki (bipolar/manic depressive disorder) – sjúkdóminn sem hafði haft mikil áhrif á lífshlaup hans og listsköpun.

Eftir andlát Sigurbjörns ákváðu Atli Már, bróðir hans, foreldrar þeirra, Þorgrímur Baldursson og Jenný G. Sigurbjörnsdóttir, og vinir hans, að safna saman öllu efni sem Sigurbjörn hafði samið og gefa það út á vinyl plötum og geisladiskum. „Mikið af efninu hafði aldrei verið gefið út áður og var bara til á hörðum diskum hjá honum,“ segir Atli Már.

Stofnað var til hópfjármögnunar á Karolinafund til að fjármagna útgáfuna og kom fram að allur ágóði yrði gefinn til styrktar sjálfsvígsforvörnum. „Nú þegar Bjössi hefði átt 45 ára afmæli, 24. febrúar, er komið að því að gefa Píeta samtökunum eina milljón króna, sem er ágóði af sölu tónlistar Biogen, bæði af sölu platna og geisladiska, auk STEF tekna sem hafa safnast upp,“ segir Atli Már.

Sigurbjörn, Bjössi Biogen

Sig­ur­björn Þor­gríms­son, eða Bjössi Biogen eins og flestir þekktu hann sem, var einn af frum­kvöðlum íslenskrar raf­tón­listar á árunum 1992 til 2011 og hafði mikil áhrif á íslensku raf­tón­list­ar­sen­una.

Fjölmargir komu að útgáfunni og vill fjölskyldan þakka þeim öllum. Sérstakar þakkir fá vinir Bjössa, raftónlistarmennirnir Árni Grétar Jóhannesson (Futuregrapher), Tanya Pollock (Röskva) og Jónas Þór Guðmundsson (Ruxpin) og fleiri fyrir aðstoð við útgáfu og Ragnar Jónasson og Ólafur Breiðfjörð (ILO) fyrir hönnun umslags (covers).

„Hann hafði ómet­an­leg áhrif á mig sem tón­list­ar­mann – og fer­ill minn sem Futuregrap­her (sem spinnur nú margar plötur og mörg ár) hefði aldrei orðið að veru­leika nema út af því að hann trúði á mig og mitt verk­efni. Hann sagði mér að halda áfram. Hann hjálp­aði mér að gefa út. Ég verð honum óend­an­lega þakk­lát­ur. En Bjössi sjálfur var tón­list­ar­snill­ing­ur. Hann var með Þór­halli Skúla­syni í Ajax. Hann var einn af þeim sem stofn­uðu Thule Records. Hann var með Tanyu Poll­ock í Weir­dcore. Hann var tón­list­ar­maður sem samdi töff tón­list og líka fal­lega tón­list. Hann var svalur – og hann var umfram allt; góður vin­ur. Margt af þessu dóti sem hann samdi og gaf út – var sjálf­út­gef­ið. Eins og plöt­urnar Mutylin og You Are Strange. Þetta dót er ófá­an­legt í dag í góðum gæð­um. Flest allt dótið sem hann gerði sem Biogen er líka mjög erfitt að finna. Þannig að það var kom­inn tími á þetta,“ sagði raftónlistarmaðurinn Árni Grétar Jóhannesson (Futuregrapher) um vin sinn, þegar hópfjármögnunin fór af stað.

Fólk með sjálfsvígshugsanir er minnt á Hjálparsíma Rauða krossins, 1717, og netspjallið. Einnig er hægt að leita til Píeta samtakanna, þar síminn 552-2218 opinn allan sólarhringinn og vefsíðan www.pieta.is.

Deila

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 
- Auglýsing -

Orðrómur

Helgarviðtalið

Lestu meira

Nýtt í dag

Í fréttum er þetta helst...

Mest lesið í vikunni

- Auglýsing -