2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

    Verðlaunatónlist Hildar í Joker flutt á tónleikum í Eldborg og Hofi: Tónlistin sem heillaði heimsbyggðina

    Óskars- og BAFTA verðlaunatónlist Hildar Guðnadóttur við Joker verður flutt á Íslandi á tónleika-bíósýningu af Kvikmyndahljómsveit Íslands; SinfoniaNord. Stjórnandi verður faðir höfundarins, Guðni Franzson. Tónleikarnir verða í Eldborg þann 31. maí og í Hofi 13. júní.

     

    Joker fékk tvenn Óskarsverðlaun og þrenn BAFTA verðlaun á þessu ári. Þar á meðal hlutu Hildur, fyrir bestu kvikmyndatónlistina og Joaquin Phoenix fyrir bestan leik í aðalhlutverki, verðlaun á báðum þessum verðlaunahátíðum. Bæði hrepptu þau einnig Golden Globe og Critics’ Choice verðlaun fyrir framlag sitt til kvikmyndarinnar.

    Tónlist Hildar er þungamiðjan í tilfinningaþrunginni vegferð aðalpersónunnar Arthur Fleck í kvikmyndinni Joker. Frábær blanda af hráum, vélrænum hljóðheimi ásamt áleitnum og undurfögrum strengjatónum, oft einungis selló, skapar undirtón vonar og óbærilegrar spennu. Einstök tónlist Hildar öðlast nýtt líf í flutningi SinfoniaNord og framkallar alveg nýja upplifun á Joker, kvikmynd Todd Phillips og margverðlaunaðri túlkun Joaquin Phoenix í aðalhlutverkinu.

    Joker

    AUGLÝSING


    Kvikmyndinni verður varpað á risastórt tjald í Eldborg og Hofi með tali og áhrifahljóðum um leið og stór sinfóníuhljómsveit SinfoniaNord leikur magnþrungna tónlist Hildar.

    Velgengni tónskáldsins á undanförnum misserum á sér nær engin fordæmi. Fyrir tónlist sína í sjónvarpsþáttaröðinni Chernobyl hefur hún hlotið Emmy og Grammy styttur auk fjölda annarra alþjóðlegra verðlauna. Fyrir tónlistina í Joker bætti hún svo meðal annars við BAFTA verðlaunum og tók nú síðast við sjálfum Óskarnum, fyrst Íslendinga.

    „Það er mér mikið ánægjuefni að fá að sjá og heyra Joker á kvikmyndasýningu með lifandi sinfóníuhljómsveit. Hljómsveitin kom með svo mikla dýpt og næmni í flutningi sínum þegar við hljóðrituðum tónlistina. Við bókstaflega héldum í okkur andanum meðan á upptökum stóð. Þetta var svo fallegt ferðalag og það gleður mig mjög að áhorfendur fái nú að njóta þess á sama hátt,“ segir Hildur.

    Leikstjórinn, Todd Phillips: “Ég tala fyrir hönd okkar allra þegir ég lýsi ánægju minni með að JOKER verði synd á kvikmyndatónleikum. Að mínu mati er það frábær leið fyrir áhorfendur til að upplifa áleitna tónlist Hildar Guðnadóttir og verða vitni að för Joaquin Phoenix í heim geðveikinnar í hlutverki Arthurs.”

    JOKER – LIVE IN CONCERT verður sýnt víða um Evrópu nú í vor á vegum enska viðburðafyrirtækisins Senbla. SinfoniaNord náði nýverið samningum um að flytja stórkostlega tónlist Hildar í Eldborg á Hvítasunnudag, 31. maí og í Hofi 13. júní.

    Miðasala hefst á tix.is, þriðjudaginn 10. mars kl. 12.

    16 ára aldurstakmark er á tónleikana.

    Lestu meira

    Annað áhugavert efni

    Nýjast á Mannlíf.is

    Nýjast á Gestgjafanum