Eigandi Tehússins á Egilsstöðum er æfur vegna fyrirætlana ÁTVR um að byrja sölu á JólaTuborg viku á undan J-deginum danska. Vill hann segja sig úr lögum við ÁTVRíkið.
J-dagurinn hefur verið haldinn hátíðlega í Danmörku síðan 1990 en þá fagna kráareigendur komu jólaútgáfu Tuborg-bjórsins.
Hefð er fyrir því að halda daginn fyrsta föstudag nóvember hvert ár en íslenskar krár hafa að sjálfsögðu tekið upp þennan hátíðardag enda Íslendingar duglegir að taka erlendar hefðir upp á sína arma.
Þetta árið ætlar Ölgerðin að leyfa kráareigendum að þjófstarta deginum, viku á undan Dönum, af þeirri ástæðu að ÁTVR mun byrja sölu á jólabjórnum viku fyrr en venjulega.
Halldór Warén, eigandi Tehússins á Egilsstöðum, er vægast sagt ósáttur við þetta þjófstart:
„Þetta eru helgispjöll!“ segir Halldór í samtali við Mannlíf og bætir við:
„Tehúsið mun að sjálfsögðu halda sig við rétta dagsetningu og halda J-daginn 5. nóvember næstkomandi.“
Halldóri er mikið niðri fyrir og greinilegt að málið snertir hjartastrengi vertsins sem þekktur er fyrir stóíska ró.
„Tehúsið og helst Austurland í heild sinni, mun segja sig úr lögum við ÁTVRíkið og fylgja í kjölfarið dönskum lögum reglum framvegis. Þar að auki munum við taka upp danskan tíma! Já, og tala aðeins hið ómþýða og fallega tungumál frænda okkar í Danmörku, að minnsta kosti föstudaginn 5. nóvember.“
Þá segir Halldór að hann stefni á að vera með beina útsendingu frá bar í Kaupmannahöfn á J-daginn.
„Ég fer til Noregs í næstu viku en mun koma við í Danmörku og ræða við bari um útsendinguna og að sjálfsögðu mun ég einnig ganga á fund Margrétar drottningar.“