Samkvæmt Austurfrétt hefur nú fengist staðfest að lamb, sem hamurinn fannst af í Fellum í byrjun vikunnar, hafi verið skotið. Óskar lögreglan eftir vísbendingum sem hjálpað geta rannsókninni.
Komu ábúendur á bænum Refsmýri í Fellum að tómu skinninu á túni neðan við bæinn síðastliðinn mánudag. Hafði þar tveggja vikna gamalt lamb verið skorið á hol og kjötið hirt.
Fram kemur í frétt Austurfréttar að tilkynning hafi borist lögreglunni á Austurlandi um málið á þriðjudagsmorgun. Var skinnið í kjölfarið sent til dýralæknis sem svo lagði mat sitt á dánarorsökum lambsins. Niðurstaðan var sú að lambið hefði verið skotið.
Að sögn Kristjáns Ólafs Guðnasonar, yfirlögregluþjóns á Austurlandi, stendur rannsókn málsins þar í dag. Engar vísbendingar hafi fundist um það hverjir hafi verið að verki. Af þeim sökum er óskað eftir að hver sá einstaklingur sem hafi vitneskju um málið hafi samband við lögregluna á netfangið [email protected].