Í gær urðu íbúar á Neðri Skaganum á Akranesi varir við fituskelli á bílum þeirra, húsum og götum. Reyndist þetta vera lýsi sem dreifst hafði um dágott svæði. Náði lýsið alla leið upp á Vitateig og þar í kring.
Skessuhorn sagði frá þessum óvænta „glaðningi“ í dag en að sögn Almars Sigurjónssonar rekstrarstjóra Fiskimjölsverksmiðjunnar hjá Brimi hf. varð óhapp er skipa átti út lýsi í höfninni. Sagði hann að fyrir útskipun sé lýsið hitað upp svo það verði dælanlegt. Þá varð það óhapp, er verið var að hita upp lýsið, að einhverskonar hringiða myndaðist í gegnum dælustútinn ofan í tankinn þannig að það gusaðist út um öndunarrörið á honum. Vindurinn sem þá var hjálpaði svo til við að dreifa lýsinu um hverfið. Segir Almar ennfremur í samtali við Skessuhorn að málið sé í vinnslu og að aðilar verði fengnir til hreinsunarstarfs á vegum Brims. Lýsið segir Almar ekki vera ætandi og að það ætti að duga að þvo það með volgu vatni og sápu
Þeir íbúar sem telja sig hafa orðið fyrir tjóni er bent á að senda Brim heimilisfangið á netfangið: [email protected].