Óvíst er með framtíð meistaraflokks beggja kynja í körfuknattleik hjá Vestra. Sárlega vantar sjálfboðaliða.
Stjórn körfuknattleiksdeildar Vestra, Ísafirði, hefur boðað til aukafundar næstkomandi laugardag, 11. september kl. 16:00 í fundarsal íþróttahússins á Torfnesi. Er þetta annar aukafundurinn sem boðaður hefur verið en fresta þurfti þeim fyrri því ekki tókst að manna nýja stjórn en það var meðal annars tilgangur fundarins. Kemur þetta fram í frétt Bæjarins besta um málið.
Í fréttinni er vitnað í tilkynningu frá sitjandi stjórn Vestra hvar segir „Það vilja allir eiga lið í efstu deildum. Það eru ekki öll félög sem tefla fram meistaraflokkum beggja kynja í Íslandsmóti.“ Ennfremur hvetur stjórnin alla sem vettlingi geta valdið að „leggja hönd á plóg“ og bjóða sig fram til stjórnarsetu.
Ásgeir nokkur skrifar athugasemd við fréttina og bendir á að sjálfboðavinna heyri sögunni til og spyr hvers vegna Vestri borgi ekki fyrir stjórnarsetuna. Því svarar Ingólfur Þorleifsson, formaður körfuknattleiksdeildar Vestra. Segir hann það satt að því miður séu sjálfboðaliðar deyjandi stétt en auðvitað væri það „óskastaða ef hægt væri að greiða öllum laun fyrir sín störf að félagsmálum. En það er ekki veruleikinn og hefur aldrei verið.“