Orkubúi Vestfjarða barst á föstudaginn tilkynningu frá íbúa á Suðureyri sem tekið hefði eftir sterka olíulykt frá kyndistöð Orkubúsins á Suðureyri. Við athugun kom í ljós leki sem hefði komið frá olíubirgðatanki fyrir kyndistöðina.
Bæjarins besta segir frá málinu í dag en þar segir að Orkubú Vestfjarða hefði haft samband undir eins við heilbrigðiseftirlitið, slökkviliðið og lögreglu. Strax var byrjað að tæma tankinn í kjölfarið og verður hann tekinn úr notkun til frambúðar. Kemur þetta fram í fréttatilkynningu frá O.V.
Tankurinn er birgðatankur við kyndistöð sem ku vera varaafl fyrir rafkynta hitaveitu á Suðureyri. Venjulega væri kyndistöðin rafkynt en líkt og sagt hefur verið frá í fréttum hefur afhending á raforku til kyndistöðvarinnar verið skert vegna ákvæða í samningum á mili O.V. og Landsvirkjunar. Orkubúið óskaði eftir því við Landsvirkjun fljótlega eftir lekann, að fá leyfi til að tryggja hita í hús á Suðureyri með því að fá að skipta aftur yfir á raforku, vegna neyðartilfellis. Það leyfi hlaust samstundis og hefur kyndistöðin því verið keyrð á raforku síðan og mun verða það þar til nýr olíutankur verður tekinn í notkun aftur.
Í yfirlýsingu Orkubús Vestfjarða kemur fram að Orkubúið harmi þær afleiðingar sem olíulekinn hefur haft á fuglalíf á staðnum. Stærð olíulekans og afleiðingar munu líklegast skýrast á næstu dögum. Yfirvöld eru höfð með í ráðum varðandi allar ákvarðanir um frekari viðbrögð og hreinsunaraðgerðir.