Í Mannlífinu á föstudaginn ræðir Reynir Traustason við Erlu Bolladóttur. Erla segir frá Guðmundar- og Geirfinnsmálinu sem flestir landsmenn þekkja, sem og krabbameininu sem hún hefur greinst með.
Þátturinn er sá fyrsti í þriggja þátta seríu og verður hann birtur klukkan átta, föstudagskvöldið 7. október á Mannlíf.is.
Erla var aðeins 20 ára með ellefu vikna gamalt barn þegar henni var haldið í gæsluvarðhaldi í 239 daga fyrir meinta aðild hennar í hvarfi Guðmundar Einarssonar og Geirfinns Einarssonar. Hún játaði að hafa orðið Geirfinni að bana eftir fjölmargar, langar yfirheyrslur en hún var í gæsluvarðhaldi þar til játning lá fyrir.
Eftir margra ára baráttu við að fá málið endurupptekið hefur hún enn ekki fundið réttlæti hjá íslenskum dómstólum. Erla glímir við ólæknandi krabbamein en ætlar ekki að gefast upp.
Missið ekki af Mannlífinu með Reyni Traustasyni klukkan 20:00, föstudaginn 7.október á Mannlíf.is.