Föstudagur 3. febrúar, 2023
2.8 C
Reykjavik

Trausti með tvö skemmtileg jólaspil í verslunum: „Ótrúlega gaman að standa í þessu“

Helgarviðtalið

- Auglýsing -

Orðrómur

- Auglýsing -

„Hvað er ég eiginlega búinn að koma mér út í?“ spyr Trausti Hafsteinsson spilaútgefandi sig reglulega þessa dagana en hann gefur ekki bara út eitt heldur tvö íslensk borðspil fyrir þessi jól. Spilin tvö eru Gettu betur spurningaspilið og skemmtispiliið Hrærigrautur.

Gettu betur og Hrærigrautur eru komin í verslanir í takmörkuðu upplagi.

Íslensk spil hafa einmitt verið valin jólagjöf ársins af Rannsóknarsetri verslunarinnar ásamt íslenskum bókum. Dagarnir hjá Trausta hafa því verið langir í desember og andvökunæturnar nokkrar. Því nær sem dregur jólum eykst álagið en brosið hverfur ekki af andliti útgefandans. „Það er ekkert stórt úgáfufyrirtæki á bak við spilin, við fjölskyldan stöndum bara saman í þessu. Okkur finnst þetta skemmtilegt og ég vona innilega að þjóðin taki spilunum opnum örmum um jólin,“ segir Trausti og bætir við:

„Það er ótrúlega gaman að standa í þessu. Það er líka strembið og í ansi mörg horn að líta núna á aðventurnni“

„Litli spilamaðurinn“

Spilin tvö eru Gettu betur spurningaspilið og skemmtispiliið Hrærigrautur. Það fyrra byggir á hinni geysivinsælu spurningakeppni Sjónvarpsins. Keppendur berjast um bjölluna og í spilinu má finna hraða-, bjöllu-, vísbendinga- og staðreyndavilluspurningar ásamt þríþrautinni. Illugi Jökulsson rithöfundur bjó til spurningar þar sem allir landsmenn geta látið ljós sitt skína.

Rithöfundurinn Illugi Jökuls bjó til spurningar og þrautir í bæði spilin.

Hrærigrautur er aftur á móti leikur að orðum fyrir alla þá sem hafa gaman af íslenskri tungu en raunar líka þá sem hafa jafnvel ekkert gaman af íslenskunni en elska skemmtilega og fjöruga keppni. Keppendur glíma m.a. við nýorðasmíði, stafarugl, hengimann og tabú. Spilið er í raun hrærigrautur af öllum skemmtilegustu orðaleikjunum sem við þekkjum og bjó Illugi til þrautirnar í spilið.

- Auglýsing -

„Allir þeir sem hafa gaman af t.d. Alias, Fimbulfambi og Kappsmáli munu elska Hrærigraut. Þetta er spil sem fær fólk til að tala, bulla og hlæja,“ segir Trausti sem er óhræddur við að framkvæma hlutina. „Ég elska að spila og fólkið í kringum mig kallar mig stundum „litla spilamanninn“. Þar sem ég elska spil er ég stoltur spilaútgefandi sem finnst gaman að vita til þess að spilin okkar fara inn á mörg heimili landsmanna til skemmtunar og ánægju. Spilin eru íslenskt hugvit og eiga heima á sem flestum heimilum enda sameina þau fjölskyldur og vinahópa“

Fjölskyldan stendur saman

Trausti stendur í spilaútgáfunni með eiginkonunni, Rún Kormáksdóttur, og hér eru þau saman með nýjustu spilin.

Trausti hvetur alla þá sem ganga með þann draum að búa til spil að kýla á verkefnið. Þó þurfa allir að vera meðvitaðir um að þetta er langt ferli. „Það þarf að byrja snemma á árinu að undirbúa spilið og svo eru þetta nokkrar rispur sem taka þarf yfir árið. Og svo er mesta klikkunin núna á aðventunni þegar langstærstur hluti spilasölu ársins fer fram,“ segir Trausti.

- Auglýsing -

„Gettu betur spilið er fullkomið fyrir fjölskylduna, feikiskemmtilegt fyrir vinahópinn og alla þá sem hafa gaman af æsispennandi spurningakeppni þar sem skiptir máli að vera fyrstur á bjölluna. Illugi bjó til 2100 nýjar spurningar þar sem áherslan var að gera þær léttari en í sjónvarpsþáttunum,“ segir Trausti og heldur áfram:

„Illugi er okkar maður og hann bjó líka til skemmtilegar þrautir í Hrærigraut. Spilið er til dæmis fyrir alla þá sem hafa gaman af íslenskri tungu og líka alla þá sem hafa kannski ekkert gaman af íslenskunni en elska fjöruga og skemmtilega keppni. Hrærigrautur er frábært spil fyrir fjölskyldur og vinahópa. Núna getur íslenska þjóðin gripið bæði spilin í jólapakkana og möndlugjafirnar en þau fást í öllum helstu verslunum landsins.“

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 

Lestu meira

- Auglýsing -

Veistu meira um málið?

Deila

Nýtt í dag

Mest lesið í vikunni

Í fréttum er þetta helst...

- Auglýsing -