2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

    Hvað er til ráða við grindarverkjum á meðgöngu og eftir fæðingu?

    Einkaþjálfarinn Sigrún María Hákonardóttir hefur sérhæft sig í meðgöngu- og mömmuþjálfun. Á næstunni ætlum við að fá hana til að svara nokkrum algengum spurningum sem snúa að þjálfun á meðgöngu og eftir fæðingu.

     

    Sigrún segir algengt að konur finni fyrir grindarverkjum á meðgöngu og eftir fæðingu. Sigrún gefur hér góð ráð hvernig má draga úr verkjum.

    Hvað er til ráða við grindarverkjum á meðgöngu og eftir fæðingu?

    Konur geta fundið fyrir mismiklum grindarverkjum á meðgöngu og eftir fæðingu. Algengast er að konur finni fyrir lífbeinsverkjum eða verkjum hjá spjaldhrygg, annað hvort öðru megin eða báðu megin. Grindarverkir stafa af relaxin hormóni sem líkaminn framleiðir á meðgöngunni til þess að undirbúa hann fyrir fæðingu.

    AUGLÝSING


    Þetta hormón getur haft áhrif í nokkrar vikur, jafnvel mánuði eftir fæðingu og geta konur því fundið fyrir grindarverkjum nokkrum vikum eða mánuðum eftir fæðingu. Sumar jafnvel í nokkur ár eftir fæðingu og er þá mikilvægt að leita ráða hjá t.d. sjúkraþjálfara sem hefur sérhæft sig í slíkri endurhæfingu.

    Ef kona finnur fyrir grindarverkjum er skynsamlegast að draga úr ýmsum æfingum sem setja ójafnvægi á grindina, eins framstig/afturstig og uppstig. Einnig gæti hjálpað að fara ekki neðar en 90 gráður í hnébeygju og ef um lífbeinsverki er að ræða að sleppa æfingum sem reyna á innanverða lærisvöðva því slíkar æfingar geta leitt upp til lífbeins og gert verkina verri.

    Þá er gott að hafa nokkra þætti í huga til þess að draga úr verkjum og það er að hafa mjaðmir alltaf í beinni línu, þannig ekki krossleggja fætur eða standa með þungann í öðrum fæti. Einnig að nýta rassvöðvana, styrkja þann vöðvahóp og vinna í því að halda tengingu við rassvöðvana og finna fyrir þeim vöðvahóp í æfingum.

    Einnig getur hjálpað að taka styttri skref, sofa með kodda á milli fóta, rúlla innanverða lærisvöðva, rassvöðva og spjaldhrygg til að losa um spennu og nýta sér lyftur þegar þær eru í boði svo dæmi séu nefnd.

    Fylgstu með í næstu viku á mannlif.is, þá mun Sigrún svara annarri spurningu sem hún fær reglulega í tengslum við þjálfun á meðgöngu og þjálfun eftir fæðingu.

    Ekki missa af þessum

    Annað áhugavert efni

    Nýjast á Mannlíf.is