Jólaboðskapurinn nær í gegn

Efnisorð

Deila

- Auglýsing -

Líklega þekkja flestir jólaboðskap Biblíunnar. Litla barnið sem lagt var í jötu í fjárhúsinu fékk gjafir frá vitringum og fjárhirðum úr haganum því þeir skildu að frelsarinn var fæddur. Æ síðan hefur fólk leitast við að gleðja hvert annað á þessum árstíma og þótt menn séu ekki kristinnar trúar hefur jólahátíðin engu að síður sinn sess í huga þeirra.

Það er ekkert athugavert við það að rækta sína fjölskyldu og jákvætt hugarfar gagnvart öðrum í nokkra daga einu sinni á ári, í raun mætti segja að það væri beinlínis öllum hollt. Undanfarin ár hafa margir hins vegar talið að þessi góði boðskapur hafi fallið í skuggann af neysluhyggjunni og græðginni. Í stað þess að vera hátíð ljóss, friðar og kærleika séu jólin hátíð kaupmanna og gráðugra ofdekraðra neytenda nútímans. Það kann að vera ýmislegt til í því en ef vel er að gáð gerist fleira á jólum en stressandi innkaup.

  1. Hjálparstarf aldrei öflugra

Það er föst venja hjá mörgum fjölskyldum að láta eitthvað af hendi rakna til góðgerðafélaga eða einhverra í sínu nánasta umhverfi á jólum. Mjög mörg góðgerðafélög senda út ákall á þessum árstíma og það er engin tilviljun, þeim er nefnilega mun betur svarað en aðra mánuði ársins.

  1. Heitstrengingar og loforð um betri tíma

Áramótin eru tímamót í hugum flestra og á þessum árstíma virðast hugir manna opnari fyrir því að breytast, batna en annars. Mjög margir strengja heit tengd áramótum og hafa jafnvel oft einsett sér hver þau muni verða þegar jólahátíðin gengur í garð.

  1. Úthugsaðar gjafir

Flestir leggja mikla vinnu í að velja gjafir. Þeim finnst mikilvægt að gleðja þiggjandann, færa honum eitthvað sem hann virkilega langar í. Sumir eru líka svo heppnir að geta búið til jólagjafir og þá fylgir ekki bara góður hugur gjöfinni heldur ómæld umhyggja sem hefur farið í að búa hana til.

  1. Heimsóknir á dvalarheimili og til eldri ættingja

Í desember aukast heimsóknir til eldra fólks oft mikið. Enginn vill að hinir eldri séu einmana um jólin og í mörgum fjölskyldum er það siður að sækja ættingja eða gamla fjölskylduvini í mat á jólunum. Þau eru líka tími til að minnast þeirra sem eru farnir héðan og fólk leggur leið sína í kirkjugarðinn til að tendra ljós á leiðum ástvina. Þessi siður sem tengist allraheilagramessu í kaþólskum sið hefur færst yfir á jólin hér á landi. Það gerir öllum gott að ylja sér við góðar minningar.

  1. Börnin læra lexíur

Öll sú samhjálp sem við sýnum um jól, tillitssemi, gleði og gjafmildi er góð lexía fyrir börnin okkar. Það er siður sumra að börnin taki til í herbergjum sínum og safni saman fötum og leikföngum sem þau eru vaxin upp úr og fari með til hjálparsamtaka. Börnin fá líka að setja pakka undir trén í stórmörkuðunum eða koma færandi hendi inn á heimili vina sinna. Á sumum heimilum er alltaf bakað í aukabauka og soðið niður meira en fjölskyldan þarf af ýmsu góðgæti og farið með það á staði þar sem það kemur sér vel.

  1. Gremjan kvödd

Hvort sem jólin eru trúarhátíð í þínum huga eða ekki finna flestir þessa hugarró og gleði sem færist yfir þegar jólalögin hljóma í útvarpinu. Allir eiga einhverja uppáhaldstónlist, annaðhvort dægurlag eða klassískt verk, sem hringir inn jólin í þeirra huga. Þá er góður siður að sleppa allri gremju, gleyma gömlum ávirðingum og ef einhvers staðar eru óleystar deilur eða bil að brúa að gera það.

 

Deila

Athugasemdir

Athugasemdir eru á ábyrgð þeirra sem þær skrá. Mannlíf áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.
 

Elsta tímarit landsins um daglegt líf, tísku, menningu, mat og lífsstíl.

Tryggðu þér árs áskrift og fáðu vikuleg tölublöð á 832 kr. stykkið eða kauptu stakt blað á 1.795 kr.

- Auglýsing -

Orðrómur

Helgarviðtalið

Lestu meira

Nýtt í dag

Í fréttum er þetta helst...

Mest lesið í vikunni

- Auglýsing -