Nýtur klámdrottning ásta?

Klámstjarnan Jenna Jameson gaf út sjálfsævisögu sína, How to Make Love Like a Porn Star árið 2004. Jenna hafði fram að því iðulega verið nefnd sem dæmi um konu sem grætt hefur á klámiðnaðinum og komist ósködduð frá þeirri vinnu. Bókin leiðir hins vegar í ljós að Jenna hefur greitt framann og ríkidæmið dýru verði.

 

Bókin byrjar á frásögn af því þegar Jenna skar vinkonu sína, Vanessu, niður úr snörunni á baðherberginu heima hjá henni. Vanessa náði ekki tvítugsaldri og þær stöllur störfuðu saman sem fatafellur á búllu sem hét Crazy Horse Too í Las Vegas. Þær áttu annað sameiginlegt. Faðir Vanessu hafði misnotað hana frá ungaaldri og hann hélt áfram að nauðga henni eftir að fullorðinsaldri var náð.

Þegar Jenna er sextán ára gömul verður hún einnig fyrir barðinu á honum. Maður þessi var mikill ofbeldisseggur og fíkn hans í smástelpur velþekkt en enginn þorði að gera neitt til að stöðva hann. Hann var kallaður Preacher hversu viðeigandi sem það viðurnefni var nú.

Líf Jennu hafði svo sem ekki verið neinn dans á rósum fram að þeirri stundu að ofbeldisseggurinn nauðgar henni. Móðir hennar dó úr krabbameini þegar hún og bróðir hennar voru smábörn. Faðir hennar virðist hafa misst kjölfestuna í lífi sínu með láti eiginkonunnar. Hann þvældist með börnin stað úr stað og lét þau mestanpart afskiptalaus. Ýmsar vinkonur hans fluttu inn og út á víxl og flestar reyndust börnunum illa.

AUGLÝSING


Nauðgað af fjórum drengjum

Jenna var fimmtán ára þegar faðir hennar keypti búgarð rétt fyrir utan Fromberg í Montana. Henni gekk illa að aðlagast lífinu í sveitinni eftir að hafa búið sína stuttu ævi í borg. Stúlkurnar tóku henni illa og lögðu hana í einelti. Jenna reyndi þess vegna að vingast við strákana í bekknum sínum. Dag nokkurn fór hún til að horfa á fótboltaleik og eftir leikinn settist hún að spjalli ásamt fjórum drengjum úr aðkomuliðinu. Þeir buðust til að keyra hana heim og hún þáði það. Í stað þess að keyra hana heim óku þeir með hana á afvikinn stað, slógu höfði hennar utan í bíldyrnar þar til hún missti meðvitund og nauðguðu henni hver af öðrum.

Lengi vel reyndi Jenna að þurrka þessa atburði úr minni sínu. Hún staulaðist heim blóðug og marin eftir árásina og laug að föður sínum að stúlkur í skólanum hefðu ráðist á sig. Viðbrögð föður hennar voru dæmigerð fyrir viðmót hans gagnvart börnum sínum. Hann spurði einskis frekar og lét málið kyrrt liggja. Jenna fékk hins vegar útrás fyrir reiði sína og vanlíðan með því að ráðast á foringja stúlknahópsins sem hafði lagt hana í einelti og var rekin úr skólanum fyrir vikið.

Með þessa reynslu í farteskinu flutti Jenna ásamt fjölskyldu sinni aftur til Las Vegas. Þar kynntist hún strák sem var þremur árum eldri og föðurbróðir hans var áðurnefndur Preacher. Jack, kærasti Jennu, hafði ekki nægilegt bein í nefinu til að standa með henni í eftir glæpinn svo Preacher var aldrei kærður. Jenna var erfiður unglingur sem barðist við margskonar andleg sár og eftir rifrildi við föður sinn flytur hún að heiman. Auðvitað flutti hún inn til Jacks og fór að vinna sem dansari í spilavítum Las Vegas. Jenna varð ein af stúlkunum í „the chorus line“ en þær eru valdar með tilliti til hæðar og útlits. Helst eiga þær að vera sem líkastar hver annarri.

Gafst upp á dansinum og fór að snúast um súluna

Móðir Jennu hafði unnið sem dansari áður en hún giftist og dóttirin vildi feta í fótspor hennar. Hún komst þó fljótt að því að dansinn var erfið vinna og þar sem hún var ekki nægilega há þurfti hún að dansa á hærri hælum en hinar. Þetta gerði henni erfiðara fyrir og eins var erfitt fyrir hana að stunda skólann því æfingaskylda er ströng í þessum danshópum. Að lokum hætti Jenna að dansa í spilavítunum og fór að dansa nektardans.

Klámstjarnan Jenna Jameson gaf út ævisögu sína How to Make Love Like a Porn Star.

Hún var aðeins sextán ára og samkvæmt lögum Nevadafylkis tveimur árum of ung til að mega dansa slíkan dans. Umsjónarmaður staðarins hafði grun um að hún væri of ung en þegar Jenna fullyrti að hún hefði náð aldri lét hann málið kyrrt liggja. Með hjálp vinkonu sinnar, Vanessu, varð Jenna fljótt vinsælasta stúlkan á staðnum. Vanessa kenndi henni hvernig best væri að bera sig að við að veiða sem allra mest af peningum upp úr vösum viðskiptavinanna. Að auki virtist það hafa dregið ákveðinn hóp karlmanna að henni að hún leit út fyrir að vera mun yngri en sextán ára.

Við lestur frásagnar Jennu er ekki hægt annað en að velta fyrir sér hvernig þeim karlmönnum sem komu til að horfa á hana dansa hefði orðið við ef þeir hefðu vitað hvað þessi sextán ára stúlka var búin að ganga í gegnum. Það er sömuleiðis vert að spyrja sig hvort dollararnir sem hún fékk í þjórfé hefðu orðið fleiri ef mennirnir hefðu vitað að hún var nýbúin að skera bestu vinkonu sína úr snörunni og bjó með kærasta sem stal af henni peningum og vandi hana á fíkniefni.

Jenna og ástin

Sjálf segir Jenna að hún hafi aldrei kunnað að velja sér karlmenn. Í bókinni eru rakin samskipti hennar við kærasta og eiginmenn sem allir, nema sá sem hún var með þegar bókin kom út, hafa sýnt henni virðingarleysi, ofbeldi, yfirgang og verið kvaldir af afbrýðisemi. Það er heldur ekki hægt að verjast þeirri hugsun að starfsval hennar hafi ýmislegt með framkomu karlmanna gagnvart henni að gera. Meðal þeirra fáu sem hún ber vel söguna er Tommy Lee, fyrrverandi eiginmaður Pamelu Anderson, en Jenna og hann áttu í stuttu ástarsambandi.

Flestir elskhugar Jennu eru samstarfsmenn hennar í klámmyndabransanum, ýmist leikstjórar eða mótleikarar. Snemma á hún einnig í lesbísku sambandi við samstarfskonu sína á nektarstaðnum og síðar verða konurnar í lífi hennar fleiri. Lengsta ástarsamband hennar við konu er samband hennar við Nikki Taylor en þær bæði unnu og sváfu saman um tíma. Hún virðist hafa sótt blíðu og huggun í fang kvennanna þegar yfirgangur og kuldi karlanna gekk um þverbak. Flest ástarsambönd hennar við konur áttu sér stað fram hjá þeim karli sem var í lífi hennar hverju sinni.

Jenna og bardagakappinn Tito Ortiz voru gift frá árinu 2006 til ársins 2013.

Jenna byrjaði fljótlega eftir að hún hóf að dansa nektardans að sitja fyrir á nektarmyndum. Ljósmyndarinn átti höfundarrétt á myndunum og borgaði henni föst laun. Sjálfur gat hann síðan stórgrætt á að selja sömu myndina aftur og aftur til hinna og þessara nektartímarita. Fyrirsætan naut minnst af ágóðanum. Leiðin í klámmyndirnar reyndist greið eftir að hafa setið fyrir um nokkurt skeið og fengið myndir birtar af sér í flestum karlatímaritum. Jenna var nægilega skynsöm til að næla sér í einkasamning við nýstofnað framleiðslufyrirtæki og setja ákveðin skilyrði um hvað hún gerði og gerði ekki fyrir framan myndavélarnar.

Á höfundarréttinn að sjálfri sér

Jenna sökk tvisvar á botn eiturlyfjafensins en tókst í bæði skiptin að venja sig af eiturlyfjunum. Hún var nýbúin að ná sér í seinna skiptið þegar hún kynnist fyrrverandi eiginmanni sínum, Justin (Jay) Sterling. Sambandið gekk í gegnum hæðir og lægðir í byrjun en þau giftust árið 2003 en skildu árið 2006. Um svipað leyti ákvað Jenna að stofna eigið framleiðslufyrirtæki og njóta sjálf ávaxtanna af þeim gróða sem líkami hennar næði að raka inn.

Jenna segir í lok bókarinnar loks hafa fundið hamingjuna. Hún segist einnig að oft finnist sér líf sitt um þessar mundir hálfgerður draumur. Með réttu ætti hún að vera löngu dáin eins og margir samstarfsmenn hennar í gegnum tíðina og hún skilji ekki hvers vegna henni hafi verið hlíft við þeim örlögum.

Tengsl kynferðisofbeldis og klámiðnaðarins

Margar rannsóknir hafa verið gerðar í Bandaríkjunum, Svíþjóð og víðar sem miða að því að kanna hvers vegna konur kjósa að stunda vændi eða starfa í klámiðnaðinum. Allar rannsóknir sýna að ótrúlega hátt hlutfall kvenna sem starfa í hefur orðið fyrir einhvers konar kynferðislegu ofbeldi á ungaaldri. Sumar rannsóknir sýna að um 80% og ríflega það hafa upplifað kynferðislegt ofbeldi í æsku, nauðgun eða hópnauðgun. Konurnar hafa nánast allar búið með ofbeldisfullum mönnum sem í mörgum tilfellum gera þær út.

Sálfræðingar, m.a. hjá Sidran-samtökunum í Bandaríkjunum, hafa að undanförnu bent á tengsl áfallaröskunar og kynferðisofbeldis. Þolendur kynferðisofbeldis sýna sterk merki áfallaröskunar og þegar ofbeldið er varanlegt getur þetta leitt til persónuleikarofs. Þolendur leitast við að fara eitthvert annað í huganum til að lifa ofbeldið af og það verður til þess að ákveðin tengsl milli sálar og líkama rofna þ.e. hugsunin verður sú að það sem kemur fyrir líkama minn kemur ekki endilega fyrir mig.

Nokkrar aðrar staðreyndir hafa þessar kannanir einnig leitt í ljós, m.a. þær að fíkniefnaneysla er meiri meðal þeirra sem starfa í klámiðnaði en í nokkrum öðrum starfstéttum þar með talið poppbransanum. Sjálfsmorð eru tíðari en hjá öðrum hópum og konur í þessum hópi verða oftar fyrir ofbeldi og morð er algengari dánarorsök hjá þeim en í nokkrum öðrum þjóðfélagshópi. Í ljósi þessara staðreynda er má velta fyrir sér hvers vegna almenningur telur að konur velji sér starf í þessum iðnaði af peningagræðgi og hvers vegna karlmenn geta keypt sér þjónustu þessara kvenna? Óneitanlega minnir það á kennarann sem sagðist berja nemanda sinn af því hann væri hvort eð er barinn heima hjá sér.

Umtalsvert hefur verið skrifað um þetta efni og m.a. má nefna skrif Gunillu Ekberg, Sheilu Jeffreys og Janice Raymond. Luisa Ek sem var vændiskona um árabil skrifaði bókina Spelat Liv og leikkonan Traci Lords skrifar um reynslu sína af klámmyndaheiminum í bókinni, Underneath it all.

Sjá einnig: Jenna Jameson er mikilll talsmaður ketó

Ekki missa af þessum

Annað áhugavert efni

Nýjast á Mannlíf.is