2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

    Sumar í sálina á miðjum vetri

    Á veturna hefur fólk meiri þörf fyrir afþreyingu en á sumrin. Litríkur gróður, hlýrra veður og birtan dregur flesta út meðan á síðarnefndu árstíðinni stendur en myrkrið, kuldinn og lægðirnar sem ganga yfir landið kalla á einhverja skemmtun þegar sú fyrrnefnda er allsráðandi. Í vetur gæti verið gaman að nýta sér eitthvað af eftirfarandi.

     

    Töfrar leikhússins

    Gestagangur

    Leikfélagið Hugleikur frumsýndi nýlega nýjan söngleik eftir Þórunni Guðmundsdóttur.

    Verkið heitir Gestagangur og gerist á stríðsárum seinni heimstyrjaldarinnar í Reykjavík. Styrjöldin er hafin og Íslendingar reyna eftir bestu getu að haga seglum eftir vindi. Þegar Bretar hernema landið finna ráðamenn leiðir til að maka krókinn og breskir hermenn reyna að vingast við heimamenn, ekki síst stúlkurnar.

    AUGLÝSING


    Nýr fangavörður hefur tekið við Hegningarhúsinu við Skólavörðustíg og það kemur í hans hlut að hýsa óheppnar stúlkur, bæði þær sem komast í kast við ástandslögin og aðrar sem eiga einfaldlega ekki í önnur hús að venda. Sýnt er í fyrrum nemendaleikhúsinu við Sölvhólsgötu.

    Eitur

    Eitur í Borgarleikhúsinu.

    Þau Nína Dögg Filippusdóttir og Hilmir Snær Guðnason sýna stjörnuleik í sýningunni Eitur í Borgarleikhúsinu. Þau urðu fyrir áfalli sem sprengdi hjónabandið og hann hélt utan til að hefja nýtt líf. Hún varð eftir í húsinu þeirra og reyndi að takast á við sorgina. Tíu árum síðar hittast þau aftur og þurfa að gera upp fortíðina. Þetta er mannleg og hlý sýning, oft nístandi sár en algjörlega frábær.

    Gleði og léttleiki

    Sýnt í Þjóðleikhúsinu.

    Shakespeare verður ástfanginn er léttur og rómantískur gamanleikur sem sýndur er í Þjóðleikhúsinu um þessar mundir. Verkið er spunnið út frá ævi skáldsins án þess þó að nokkrar traustar heimildir liggi þar að baki. Hinn ungi Will Shakespeare glímir við ritstíflu og ekkert er almennt betra til að blása mönnum nýjum hugmyndum og sagnaranda í brjóst en einmitt ástin. Þetta er flott sýning og vel til þess fallin að senda áhorfandann glaðan heim að henni lokinni.

    Jólin nálgast 

    Jólaævintýri Þorra og Þuru í Tjarnarbíói er góð leið til að koma sér í aðventustemningu. Þorri og Þura eru beðin um að passa jólakristalinn, uppsprettu allrar jólagleði í heiminum meðan afi Þorra bregður sér af bæ. Þau slökkva hins vegar óvart á honum og þurfa að leggja upp í erfitt og tvísýnt ferðalag til að finna leið til að kveikja á honum að nýju.

    Matur og drykkur með þínum allra bestu

    Salt eldhús gefur fólki færi á að læra eitthvað nýtt.

    Fátt er skemmtilegra en að elda og njóta matar með sínum nánustu. Salt eldhús gefur fólki færi á að læra eitthvað nýtt sem síðan má kynna fjölskyldunni eða hreinlega fara saman nokkur og takast á við nýjar áskoranir í matargerð. Í nóvember og desember eru mörg mjög spennandi námskeið í boði hjá þeim og Jóla-Galdrar er námskeið sem einmitt er tilvalið til að koma mönnum af stað í jólaundirbúningnum. Sigríður Björk Bragadóttir, einn eiganda Salt eldhúss, kennir hvernig búa má til kjúklingalifrarpaté, biscotti, karamellusósu og fleira gómsætt á jólaborðið. En þetta eru einnig fallegar og skemmtilegar jólagjafir.

    Helgarferðir

    Vetrarfegurð er mikil víða á Íslandi og finna má ótal notalega og þægilega gististaði allt í kringum landið. Það er ævintýri að gerast túristi í eigin landi og upplifa norðurljósin, heitu pottana, nútíma íslenska matargerð og gestrisnina. Oft eru mjög hagstæð tilboð á kvöldverði og gistingu í vefverslunum og sniðugt að hafa augun opin fyrir slíku og halda svo af stað.

    Út að borða

    Ómissandi hluti af aðventunni hjá mörgum er að fara út að borða. Velja sér flottasta, nýstárlegasta eða gómsætasta jólahlaðborðið og smala svo saman vinahópnum eða fjölskyldunni og fá sér eitthvað verulega gott. Veitingamenn mæla með að fólk panti tímanlega því staðirnir eru fljótir að fyllast í desember.

    Ljúfir tónar

    Tómas R. Einarsson sendi frá sér nýjan disk á dögunum, Gangandi bassi.

    Margir tónlistarmenn hafa alveg gefist upp á að gefa út geisladiska eða plötur. Nokkrir halda þó enn í hefðina og það er eins með plötur og diska og bókina að enn er til fólk sem nýtur þess að handleika fallega hannað umslag um leið og tónlistin hljómar úr tækjunum.

    Tómas R. Einarsson er einn allra besti tónlistarmaður landsins og hann sendi frá sér nýja disk á dögunum. Gangandi bassi. Um tilurð hans hefur Tómas sagt: „Ég keypti minn fyrsta kontrabassa í Ósló í ágúst 1979. Á sólríkum sumardegi. Ég hafði prófað að læra á hljóðfæri veturinn áður í Tónskóla Sigursveins, hjá enskum bassaleikara sem var í Sinfóníunni. Því námi lauk með ósigri mínum, bassaboginn og klassíkin voru víðs fjarri áhugasviði mínu. En ég var byrjaður að hlusta á djass og þegar ég sá fallegt hljóðfæri inn um búðarglugga, fór ég inn, vel fjáður eftir að hafa tekið þátt í að byggja borpall í Stavanger, og keypti hljóðfærið. Fór svo að spila með plötum og svo síðar fólki. Og var búinn að gera það í nákvæmlega 40 ár þegar ég tók upp nýju plötuna, Gangandi bassi, í ágúst síðastliðnum.“ Disknum verður fylgt eftir með spennandi útgáfutónleikum í Hörpu þann 17. nóvember.

     Jólatónleikar

    Árlega bætist í hóp þeirra tónlistarmanna sem kjósa að halda jólatónleika. Tónlist er órjúfanlegur hluti af jólahaldi og það er bæði hátíðlegt og skemmtilegt að fara á tónleika fyrir jólin. Hvort menn kjósa að fara á stóran viðburð með tilheyrandi glysi og glamúr í einhverri tónleikahöll eða ganga inn í litla kirkju og hlusta á tvo tónlistarmenn miðla anda jólanna er smekksatriði en hvort sem fyrri eða síðari kosturinn hljómar betur er nauðsynlegt að kaupa miða fljótt því eftirspurnin er mikil og margir viðburðir seljast upp um leið.

    Ekki missa af þessum

    Annað áhugavert efni

    Nýjast á Mannlíf.is