Nú líður að bolludegi sem okkur á ritstjórn finnst nú með skemmtilegri dögum á árinu. Hér eru uppskriftir að mismunandi fyllingum og sósum sem gera hvaða bollur sem er ómótstæðilegar. Sumir kjósa vatnsdeigsbollur en öðrum finnst gerbollurnar meira spennandi. Hvort sem valið er, eru þær gómsætar og girnilegar og lyfta okkur upp í skammdeginu.
Bollur með hindberjum og hvítu súkkulaði
Hindberjasósa
300 g frosin hindber
1 dl sykur
½ dl vatn
1 tsk. maizena-mjöl
Setjið allt saman í pott og látið sjóða saman í 10-15 mín. Sigtið blönduna og notið skeið til þess að ná sem mestu af sósunni í gegnum sigtið. Látið kólna.
Rjómi með hvítu súkkulaði
2 ½ dl rjómi
200 g hvítt súkkulaði, gróft saxað
½ tsk. vanillukorn (má sleppa)
Setjið ½ dl af rjómanum í skál ásamt súkkulaðinu og hitið varlega saman yfir vatnsbaði. Gætið þess að hafa hitann ekki of háan því hvítt súkkulaði er mjög viðkvæmt fyrir of háum hita. Látið súkkulaðiblönduna kólna alveg þar til hún hefur náð stofuhita.
Þeytið restina af rjómanum með vanillufræjum. Takið 3-5 kúfaðar msk. af þeyttum rjóma og hrærið saman við súkkulaðið (þetta er gert til þess að auðveldara sé að blanda súkkulaðiblöndunni við þeytta rjómann).
Hrærið súkkulaðiblönduna varlega saman við restina af þeytta rjómanum með sleikju.
Glassúr
1-2 dl flórsykur
2-3 tsk. hindberjasósa eða vatn
Blandið saman flórsykri og hindberjasósu eða vatni þar til glassúrinn er hæfilega þykkur. Setjið gjarnan 1 dropa af rauðum matarlit út í.
Setjið bollurnar saman með hindberjasósu og súkkulaðirjóma. Setjið glassúr ofan á og jafnvel nokkra dropa af hindberjasósunni. Skreytið gjarnan með hvítu súkkulaði og ferskum hindberjum.
Súkkulaðilakkrísbollur
0-12 bollur að vali
Á milli
200 g rjómaostur
2-3 msk. flórsykur
1 tsk. lakkrísduft
3 dl rjómi þeyttur
½ dl lakkrískurl til að skreyta með
Hrærið rjómaost, flórsykur og lakkrísduft saman. Bætið þeyttum rjóma varlega saman við. Það má líka setja hluta af rjómanum saman við og fá bragðmeira krem og setja þá rjóma og krem á milli í bollurnar.
Skerið bollurnar í tvennt og setjið krem á milli. Setjið súkkulaðikrem ofan á og skreytið með lakkrískurli.
Súkkulaðikrem
1 dl rjómi
100 g súkkulaði, saxað
1 tsk. lakkrísduft
Setjið súkkulaði og lakkrísduft ískál. Hitið rjómann og hellið yfir súkkulaðið. Látið standa í nokkrar mínútur og hrærið síðan saman.
Hér er svo að finna myndband sem sýnir hvernig á að gera hinar fullkomnu vatnsdeigsbollur.
Texti / Sigríður Bragadóttir
Stílisti / Hanna Ingibjörg Arnarsdóttir
Myndir / Hákon Davíð Björnsson