Fyrsta plata bandaríska tónlistarmannsins Tōth er nú komin út á vegum bandarísku/íslensku útgáfunnar figureight. Platan varð til vegna ástarsorgar.
Tōth er listamannsnafn Alex Toth, sem hefur gert garðinn frægan með hljómsveitinni Rubblebucket.
Platan ber heitið Practice Magic And Seek Professional Help When Necessary og hefur fengið frábærar viðtökur síðan fyrstu lög og myndbönd litu dagsins ljós fyrir nokkrum vikum. Meðal annars hafa hinir virtu miðlar NPR, Stereogum, The Clash, The Line of Best Fit og Gorilla vs Bear farið fögrum orðum um plötuna.
Myndböndin má finna hér, meðal annars stórbrotið myndband frá tyrkneska leikstjóranum Mu Tunc sem tekið er í Istanbul og sýnir ýmsar hliðar á borginni.
Platan varð til vegna ástarsorgar þegar Alex og hinn helmingur Rubblebucket luku ástarsambandi sínu til 11 ára. Á sama tíma fótbrotnaði Alex þegar hann var á sviði með pönkhljómsveitinni sinni og í kjölfarið tóku við margir dagar af einsemd á meðan fóturinn og hjartað jöfnuðu sig.
Þarna urðu fyrstu lög plötunnar til. Þegar vinkona Alex, tónlistarkonan Kimbra, heyrði lögin skipaði hún honum að gefa þau út og þar fór platan að taka á sig mynd.