Seðlabankinn var ósáttur með Latabæ árið 2001.
Árið 2001 stoppaði Seðlabanki Íslands útgáfu á Latóseðlum en voru þeir framleiddir af Magnúsi Scheving og félögum sem stóðu fyrir Latabæ. Hugmynd var sú að með Latóseðlum ætti að vera hægt að kaupa hluti og þjónustu sem stuðla að hollustu. Sem dæmi má nefna miða í sund eða skyrdollu og var þetta unnið í samstarfi við Búnaðarbankann.
„Lató er ætlað að vera hollasti gjaldmiðillinn á hnattkringlunni og ýta undir heilbrigt líferni hjá íslenskum börnum,“ sögðu talsmenn Latabæjar í viðtali við Fréttablaðið árið 2001 um málið. Lögfræðingar Seðlabanka Íslands stoppuðu þessa seðlaútgáfu en þóttu Latóseðlarnir of líkir íslenskum peningaseðlum og að slík útgáfa væri lögbrot.
„Það verður engin grundvallarbreyting en seðlarnir sjálfir verða einhvern veginn aðeins öðruvísi í útliti. Þetta má sem sagt ekki vera beinlínis peningaseðill heldur frekar afsláttarmiði. Hugmyndin sjálf er óbreytt.“
Lató-hagkerfið gekk nokkuð vel í nokkur ár en lagðist af á endanum.
