Gagnrýni á veitingastaði hefur lengi verið þekkt í dagblöðum um allan heim en ein gagnrýni Jónasar Kristjánssonar hafði mikil áhrif árið 1998.
„Thailand er út úr kú, óvenjulega ljótur kvöldverðarstaður með fremur dýran mat, en stundum bragðgóðum, á annarri hæð við Smiðjustíg, milli Laugavegs og Hverfisgötu,“ sagði Jónas Kristjánsson, þáverandi ritstjóri DV, í DV í mars 1998. Jónas var að gagnrýna asíska veitingastaðinn Thailand. Við lesturinn er ljóst að margt var að staðnum.
„Húsakynni eru hrörleg og lítið fyrir þau gert, máluð brún í hólf og gólf. Berar perur hanga í salarlofti og undarlegar fjölskylduljósmyndir í stigagangi. Byrgt er fyrir glugga, með speglum á aðra hlið og fallhlerum á hina, rétt eins og stríðið sé að koma,“ skrifaði Jónas meðal annars um staðinn.
„Kjúklingabitar á bambusspjótum voru hins vegar þurrir og gervilegir. Djúpsteiktar ferskvatnsrækjur voru hæfilega stinnar, en ofklæddar í hjúpi. Salöt voru einföld og bragðsterk og salatsósur magnaðar. Kryddi virðist grýtt á báða bóga í eldhúsinu, ólíkt því sem ég hef kynnzt í tælenzkri matreiðslu erlendis. Við prófuðum ekki hálfkæringsnefnda sjávarrétti drukkna sjómannsins, en hroðalega bragðsterkir „dínamítpinnar“ þræddu heilan chili-pipar, heilt hvítlaukslauf og eina rækju. Ég set spurningamerki við framboð rétta af slíku tagi,“ hélt hann áfram en þó voru hlutir sem honum fannst góðir.
„Margt er gott á Thailandi á góðum degi, einkum bragðsterkar og hressandi sítrónusúpur af ýmsu tagi, til dæmis rækjusúpan Tom-yam-kung. Beztar vora bragðmildar Phat-thai núðlur með rækjum, hrísgrjónum, baunaspírum og jarðhnetum, mildar og góðar.“.
Þessi gagnrýni Jónasar virðist hafa haft mikil áhrif á eigendur og/eða viðskiptavini staðarins því að í ágúst á sama ári var búið að skella í lás á staðnum og í gluggann hans var miði sem á stóð:
„Veitingahúsið Thailand hefur verið tekið af lífi. Vopn: hrokafullur penni. Böðull: Jónas Kristjánsson, ritstjóri DV. Útförin fór fram í kyrrþey.“