Brotist inn á skrifstofur Mannlífs í nótt

Brotist var inn á skrif­stofur Mannlífs í nótt, tölvur teknar og öllum greinum af vefnum eytt út.

Í gær var brot­ist inn í bíl rit­stjór­ans, Reynis Trausta­sonar, teknir lyklar og aðrar eignir hans.

Reynir kom að bílnum þar sem hann var lagður í stæði fyrir neðan Úlf­ars­fell. Búið var að brjóta rúðu og taka meðal ann­ars lykla, úlpu, hunda­búr og göngu­búnað.

Fjöldi bíla voru í stæð­unum, enda var Reynir í sinni viku­legu ferð á Úlf­ars­fell með göngu­hóp. Einungis var brot­ist inn í bíl Reynis. Aðrir bílar voru ósnertir.

Morg­un­inn eftir kom í ljós að lykl­arnir úr bílnum hefðu verið not­aðir til að kom­ast inn á skrif­stofur Mannlífs, en taka skal fram að það eru engin opin­ber gögn um það hvar skrif­stof­urnar eru stað­settar.

Teknar voru bæði tölvur rit­stjóra og gæða­stjóra. Ekkert var brotið né bramlað og engin önnur verð­mæti en tölv­urnar voru tekin, en í nótt var öllum greinum Mannlífs eytt út af síð­unni.

Lög­reglan er nú með málið í rann­sókn og eru taldar góðar líkur á því að glæpa­menn­irnir finn­ist en Mannlíf hefur setið undir hót­unum síð­ustu daga. Ennþá er unnið í því að end­ur­heimta greinar síð­ast­lið­inna sex daga.