Samfélagsrýnirinn Björn Birgisson úr Grindavík segist litla sem enga virðingu bera fyrir þeim Loga Einarssyni, formanni Samfylkingarinnar, Sigmundi Davíð Gunnlaugssyni, formanni Miðflokksins, Ingu Sæland, formanni Flokks fólksins, og Þorgerði Katrínu Gunnarsdóttur, formanni Viðreisnar.
Ástæðan eru aukagreiðslurnar sem þau þiggja fyrir að vera formenn flokka en ekki ráðherrar, greiðslur sem tryggðar voru á valdatíma Davíðs Oddssonar.
Björn gengur svo langt að kalla þessar aukagreiðslur „mútur“ sem hafi átt að liðja fyrir samþykkt á hækkuðum eftirlaunum ráðamanna á sínum tíma.
Honum þætti eðlilegast að formennirnir þiggi ekki þessar greiðslur, að minnsta kosti ekki vilji þau hljóta virðingu hans.
„Sá sem hefur sjálfsvirðingu í góðu lagi tekur ekki eða þiggur allt sem að honum er rétt. Það þarf að vega og meta hvað er í lagi að þiggja og hvað er ekki í lagi. Stjórnmálamenn þurfa að takast á við margar freistingar, sérstaklega þeir sem völdin hafa. Gæta þess að misnota ekkert. Taka ekki við eða þiggja neitt sem hæfir ekki stöðu þeirra – eitthvað sem góð sjálfsvirðing og almannarómur telja ekki vera í lagi,“ segir Björn og heldur áfram:
„Að formenn flokka á þingi – sem ekki eru ráðherrar – skuli hafa 673 þúsund krónur algjörlega aukalega á mánuði, til viðbótar við þingfararkaupið, eingöngu fyrir að vera formenn flokka sinna – án þess að skila nokkurri vinnu til ríkisins! Vel yfir 8 milljónir á ári!“
Björn telur að það segi margt um Loga, Ingu, Sigmund Davíð og Þorgerði Katrínu að þiggja þessar mánaðarlegu greiðslu. Það segir hins vegar enn meira um þá sem hafna henni, Pírata.
„Þessi sporsla var ekkert annað en mútur. Það fólk sem ekki hefur næga sjálfsvirðingu til að skynja hve óheilbrigt er að þiggja þessa greiðslu – getur ekki ætlast til þess að annað fólk beri virðingu fyrir því. Alla vega geri ég það ekki,“ segir Björn.