Hildur Hermóðsdóttir, bókaútgefandi og kennari, lést á Hrafnistu Boðaþingi, 18. febrúar síðastliðinn, 73ja ára að aldri. Hildur er annar stofnandi bókaútgáfunnar Sölku.
Tilkynning um andlát Hildar birtist í dag í Morgunblaðinu.
Hildur fæddist 25. júlí 1950, í Árnesi í Aðaldal þar sem hún ólst upp. Foreldrar Hildar voru Jóhanna Álfheiður Steingrímsdóttir og Hermóður Guðmundsson, bændur sem einnig ráku veiðiheimilisrekstur í Árnesi.
Hildur útskrifaðist frá Kennaraskóla Íslands árið 1972 og lauk BA-prófi í bókmenntafræði frá Háskóla Íslands árið 1980. Hún starfaði sem grunnskólakennari frá 1972 og við dagskrárgerð hjá RÚV auk þess að fjalla um bækur í dagblöðum.
Hildur kenndi íslensku og bókmenntir við Fósturskóla Íslands árin 1982-1986 en hóf því næst störf sem ritstjóri barnabóka hjá Bókaútgáfu Máls og menningar frá 1986 til ársins 2000 þegar hún stofnaði Bókaútgáfuna Sölku ásamt Þóru Sigríði Ingólfsdóttur. Hildur tók síðan alfarið við Sölku árið 2002 og rak umfangsmikla útgáfu til haustsins 2015. Hún seldi útgáfuna sama ár og stofnaði Textasmiðjuna.
Hildur sat meðal annars í stjórn Máls og menningar meðan hún starfaði þar einnig sat hún lengi í stjórn Félags Íslenskra bókaútgefenda. Þá sendi hún frá sér bókina Ástin á Laxá, Hermóður í Árnesi og átökin miklu árið 2022.
Eiginmaður Hildar var Jafet Sigurður Ólafsson framkvæmdastjóri en hann lést í nóvember síðastliðnum. Börn þeirra eru Jóhanna Sigurborg, Ari Hermóður og Sigríður Þóra. Barnabörnin eru fimm.