Ef hægt er að segja að eitthvað eitt ákveðið hafi einkennt nóttina á höfuðborgarsvæðinu væri það ölvun og það mikil ölvun.
Í miðbæ Reykjavíkur var tilkynnt um þrjá aðila sem vopnaðir voru hnífum í slagsmálum en þeir voru á brott er lögreglan mætti á staðinn og fundust ekki.
Tveir aðilar voru handteknir og vistaðir í fangaklefa vegna þess að þeir gátu ekki framvísað skilríkjum eða gert grein fyrir sér. Eru þeir grunaðir um ólöglega dvöl hér á landi.
Eigendur þriggja skemmtistaða í miðborginni eiga von á kæru þar sem dyraverðir voru ekki með réttindi eða þeir voru of fáir.
Og þá að blessaðri drykkjunni. Pöddufullur aðili í miðborginni fékk gistingu í fangaklefa lögreglu þar sem hann stóð ekki í lappirnar og átti ekki í nein hús að vernda. Annar moldfullur aðili fékk aðstoð lögreglu þar sem hann gat ekki með nokkru móti gengið og var honum skutlað heim. Í hverfi 105 var moldfullur einstaklingi komið í húsaskjól þar sem hann var ósjálfbjarga. Þá var stjörnufull kona til vandræða fyrir utan skemmtistað í miðbæ Reykjavíkur. Var henni ekið til síns heima þar sem engar líkur á því að hún myndi koma sér heim hjálparlaust. Þá voru afskipti höfð af rokfullu ungmenni fyrir utan skemmtistað í miðborginni en ungmennið var flutt á lögreglustöð þar sem foreldrar þess náðu í það. Aukreitis voru þó nokkrir ökumenn stöðvaðir vegna gruns um ölvun.
Sautján ára unglingur var handtekinn í miðborginni þar sem hann var að tálma störf lögreglu en þegar reyndar var að ræða við hann neitaði hann að gefa upp nafn og kennitölu. Var drengurinn fluttur á lögreglu þar sem rætt var við hann, samband haft við móður hans sem sótti hann.
Í Breiðholtinu voru skötuhjú nöppuð við að stela úr verslun en samkvæmt dagbók lögreglu var málið afgreitt með „vettvangsformi“, hvað sem það nú þýðir.
Í Kópavogshöfn var kveikt í rusli í nótt en slökkviliðið slökkti eldinn en einhverjar skemmdir urðu á landgangi sem lá út á flotabryggju.