Glærumálið í Verzlunarskólanum hefur fært Sigmundi Davíð Gunnlaugssyni, formanni Miðflokksins, meiri athygli en hann hefur notið síðan hann lét mynda sig við að éta hrátt kjöthakk í kosningabaráttu fyrir síðustu alþingiskosningar. Eins og kunnugt er gekk Miðflokkurinn í gegnum fylgishrun og náði með herkjum að hanga inni á þingi með þrjá menn. Annað áfall dundi svo yfir þegar þriðjungur þingflokksins, Birgir Þórarinsson, gekk til liðs við Sjálfstæðisflokkinn.
Eyðimerkurgöngu Sigmundar Davíðs lauk síðan þegar Óli Njáll Ingólfsson henti Sigmundi upp á glæru ásamt Benito Mussolini og Adolf Hitler undir þeim formerkjum að þeir kónar væru þjóðernissinnar. Síðan hefur Sigmundur Davíð verið sem fórnarlamb í ótal viðtölum en þó náð að harka að sér. Nú síðast mætti hann í Dagmál Moggans til að baða sig í ljósi athyglinnar. Þar sagði hann að sér hafi í raun „brugðið óþægilega lítið“ þegar glæran varð opinber. Fórnarlambið sagðist hafa þurft að þola svo margt. Sigmundur vildi þó ekki staðfesta hvort hann væri þjóðernissinni og vafðist tunga um tönn við spurninguna, að sögn Moggans …