Hljómsveitin Above The Lights var að senda frá sér sína fyrstu EP-plötu og ber hún sama nafn og hljómsveitin.
Lögin eru mjög persónuleg og má segja að platan í heild sé einhvers konar ferðalag úr myrkri yfir í ljósið.
Hljómsveitina skipa þrír einstaklingar, Eyþór Bjarni Sigurðsson, Kolbrún Þorsteinsdóttir og Kristófer Nökkvi Sigurðsson, og platan var unnin í samstarfi við Stefán Örn Gunnlaugsson í stúdíó Bambus. „Við vorum með vissan hljóm sem við vildum ná fram og Stefán náði að fanga þann hljóm fullkomlega. Við gætum ekki verið sáttari við útkomuna, hún er á sama tíma bæði dimm og hugljúf. Viðfangsefnin eru þung eins og til dæmis í laginu By The Tower þar sem ég fjalla um upplifun mína af því að vera 21 árs, heimilislaus í yfirgefnu húsi rétt fyrir neðan Hallgrímskirkju. Ég held að hafi aldrei upplifað mig eins einmana á ævinni,“ segir Eyþór.
Stór hluti lífs hans helgaður því að hjálpa öðrum
Eyþór, annar söngvari hljómsveitarinnar, hefur verið edrú til margra ára og segir hugleiðslu og andlega iðkun hafi bjargað lífi sínu. Stór hluti lífs hans sé helgaður því að hjálpa öðrum. Þó að platan sé persónulegt uppgjör við fortíðina og fjalli um erfið viðfangsefni sé hún á sama tíma full af fegurð og von. „Það sem einkennir einna helst þessa fyrstu plötu Above The Lights eru fallegar melódíur en drungalegur undirtónn. Með útgáfu þessarar plötu líður mér eins og vissum kafla í lífi mínu sé lokið og ég geti farið að einbeita mér að öðrum lögum,“ segir Eyþór.
„Þetta er ekki tónlist sem maður ætti að spila í partíum, barnaafmælum eða hressum veislum, heldur meira svona einn með sjálfum sér þegar maður vill láta hugann reika,“ bætir Kolbrún við brosandi og mælir með því að fólk gefi sér tíma til að hlusta á þessa fyrstu EP-plötu Above The Lights. Hægt er að hlusta á plötuna á öllum helstu streymisveitum og auðvitað á albumm.is.