Drukknir unglingar skemmdu bíla og brutu rúður í Fossvogi: „Þarna eru örfá rotin epli“

Unglingar í Fossvogi drukku landa og skemmdu bíla og rúður árið 1998

„Þarna eru örfá rotin epli og það verður að vara foreldra við að hleypa börnum sínum í svoleiðis hóp. Það er fjarri því að það séu margir slæmir krakkar þarna. Þeir safnast fyrir hjá okkur, þetta gerðist þegar félagsmiðstöðvarnar fóru að loka fyrr á kvöldin um helgar. Þá tóku sjoppurnar við. Þær eru orðnar félagsmiðstöðvar milli hálftíu og hálftólf á kvöldin. Loks tekur miðbærinn við þeim sem mega og geta verið úti eftir þann tíma,“ sagði Bjarni Sveirrisson, eigandi Toppmynda, um málið við DV árið 1998. Hann rak fimm videoleigur í borginni, meðal annars í Grímsbæ, á þeim tíma og taldi unglingadrykkjuna versta í Fossvogi og að landadrykkjan hafi aukist allt að 70% á einu ári. Þó sagði hann að drykkjan hafi minnkað til muna eftir að lögreglan byrjaði að mæta reglulega á svæðið. Boðað var til fundar vegna málsins í hjá foreldrum 10. bekkinga í Réttarholtsskóla.

„Við verðum ekkert vör við fikniefnaneyslu eða annað slíkt hér í skólanum, svona hlutir gerast yfirleitt í tíma foreldranna,“ sagði Ása Kristín, aðstoðarskólastjóri Réttarholtsskóla. En fram kemur í fréttinni að skemmdir hafi verið unnar á bílum og rúður brotnar í kringum Grímsbæ.

„Við erum sannfærð um að þetta er blandaður hópur, krakkar sem koma víða að. En við viljum að hverfið okkar sé öruggt og hér líði öllum vel,“ sagði Guðríður Stefánsdóttir, formaður Foreldrafélags Réttarholtsskóla.