„Ég veit ekki hvert ég á að fara með þessa reikninga. Ekki get ég sett þá á leiðið hans pabba,“ sagði Fríða Albertsdóttir við DV árið 1999 um leiðindamál sem hún þurfti að glíma við frá 1996 til 1999.
Þá hafði Albert Ingibjartsson, faðir Fríðu, látist árið 1996 en sýslumaðurinn á Ísafirði hélt áfram að rukka Albert um opinber gjöld, fjölskyldu hans til mikillar armæðu. Fríða staðhæfði að hún hefði farið á fund með fulltrúa sýslumanni þar sem endalega var gengið frá skiptum á dánarbúi föður hennar. Þetta gerði hún skömmu eftir jarðarför Alberts.
„En þeir halda áfram að rukka pabba,“ sagði Fríða um málið.
„Þetta þykir mér leitt að heyra. Hér hafa orðið einhver mistök,“ sagði Ólafur Helgi Kjartansson, sýslumaður á Ísafirði, í samtali við DV. Hann lofaði að innheimtuaðgerðum á hinum látna myndi linna.