Borgarstjóri hafði áhyggjur af ofbeldi í Reykjavík árið 1990.
„Þetta er ekki áhyggjuefni lögreglunnar frekar en þjóðfélagsins i heild. Það er ekkert eitt afl í þjóðfélaginu sem getur komið í veg fyrir þetta. Það er að mínu viti ekki æskileg þróun hvað hefur grynnkað á ofbeldishneigð hjá fólki. Það er meira um tilefnislaust ofbeldi nú en áður,“ sagði Böðvar Bragason, lögreglustjóri i Reykjavík, í samtali við DV árið 1990. Tilefni viðtalsins var að þrjár alvarlegar líkamsárásir voru gerðar eina helgi í ágúst 1990. Böðvar benti á að veitingastöðum hefði á undanförnum áratug fjölgað mikið og með því hefði áfengisneysla aukist. Taldi hann að þessir hlutir ættu hlut að máli.
Davíð Oddsson, þáverandi borgarstjóri Reykjavíkur, var ósammála því og gaf í skyn að bjór róaði fólk. „Slíkir atburðir hafa gerst áður. Borgin er ekki hættuleg í þeim venjulega skilningi sem við leggjum í slíka hluti. Atburðir, eins og þeir sem áttu sér stað um helgina, hringja aðvörunarbjöllum í hugum flestra. Atburðir sem þessir eru að meginhluta til mál lögreglu. Mál vagnstjórans snýr að okkur líka sem vinnuveitanda. Það er engin einföld lausn til á svona málum. Það þarf að fjalla um þetta af yfirvegun,“ sagði Davíð en þar var Davíð að vísa í líkamsárás sem strætóbílstjóri varð fyrir og nefndi að það ætti mögulega að senda þá á einhvers konar námskeið til að hjálpa þeim í erfiðum aðstæðum.