Íslenska ríkinu hefur verið gert að greiða Alberti Klahn Skaftasyni upphæð er nemur 26 milljónum króna í bætur.
Albert var einn sakborninga í hinum alræmdu og illræmdu Guðmundar- og Geirfinnsmálum sem hafa ásótt íslensku þjóðinina eins og draugur í áratugi.
Kemur fram að Albert krafði ríkið um 200 milljónir króna vegna frelsissviptingar sem og miska sem hann varð fyrir vegna málsins.
Hafði Albert áður fengið greiddar 15 milljónir króna í bætur úr ríkissjóði árið 2020 og sú fjárhæð kemur til frádráttar þeirri upphæð sem nú hefur verið ákvörðuð.
Að því er kemur fram í dómi Héraðsdóms Reykjavíkur var kröfu Alberts um 8 milljóna króna bætur vegna fjártjóns sem hann varð fyrir vegna tekjumissis vísað frá dómi.
Gjafsóknarkostnaður Alberts mun greiðast úr ríkissjóði; þóknun lögmanns hans upp á 4 milljónir króna.
Í niðurstöðu dómsins segir að Albert eigi rétt á miskabótum vegna gæsluvarðhaldsvistar; sakfellingar sem og afplánunar vegna málsins:
„Verður einnig litið til þess að stefnandi þurfti um langt árabil að þola að vera dæmdur sekur fyrir aðild að hvarfi Guðmundar, til þeirrar andlegu og líkamlegu raunar sem sakfellingin og frelsissviptingin olli honum, til þess að hann sætti vanvirðandi meðferð í gæsluvarðhaldi, til þess að sakfelling hans var gerð á grundvelli rannsóknar og málsmeðferðar sem braut gegn rétti hans sem sakbornings til réttlátrar málsmeðferðar, og afleiðinga alls framangreinds á andlega og líkamlega heilsu hans,“ segir ennfremur í niðurstöðunni.