Lögmaðurinn og stjórnarmaður í sjávarútvegsfyrirtækinu Brimi, Kristrún Heimisdóttir, var ósátt við sumt í viðtali sem Andrés Magnússon blaðamaður Morgunblaðsins tók við hana.
Blaðamaðurinn Andrés „hefur beðið mig afsökunar á því að blaðið prentaði í dag texta hans að viðtali við mig sem innihélt setningar sem ég sagði aldrei og lýsa skoðunum blaðamannsins en ekki mínum,“ segir Kristrún og bætir við:
„Þrátt fyrir að ég gerði að skilyrði fyrir hinu prentaða viðtali að ég fengi textann til yfirlestrar, því auðvitað talar enginn fyrir mig annar en ég sjálf, og þrátt fyrir að ég sendi verulega leiðréttan texta í gærkvöld þar sem ég þurfti að fella út orð sem ekki voru mín og ég myndi aldrei nota, prentaði blaðið útgáfu blaðamannsins og þannig birtist viðtalið í dag.“
Kristrún segist „alltaf leitast við að vanda orð mín um allt og alla; mér finnst mjög miður að svona fór.“
Kristrún bendir á að ef fólk vilji heyra það sem eru „ótvírætt mín eigin orð um málefnið sem um ræðir er að finna þar sem ég tala sjálf í Dagmála-þætti Morgunblaðsins og Morgunvakt Rásar 1 sl. föstudag,“ og bendir enn fremur á að vilji fólk kafa djúpt ofan í það efni sem til umræðu var í viðtali Andrésar við hana þá sé ítarleg og ritrýnd fræðigrein hennar að finna í „nýjasta hefti Tímarits lögfræðinga, sem er fáanlegt í stafrænni útgáfu á vef og á skrifstofu Lögfræðingafélags Íslands.“
Rithöfundurinn góði og blaðamaðurinn Börkur Gunnarsson segir að það sé „ömurlegt að lenda í svona mistökum blaðamanns þegar búið er að leggja á sig svona mikla vinnu við að greina mikilvægt mál samtímans.“
Annar unnandi bókmennta, fræðikonan Helga Kress, tekur undir orð Barkar og bætir við þökkum: „Þakka þér fyrir að segja frá.“
Og Marta Nordal er líka ánægð fyrir hönd Kristrúnar:
„Það vitum við sem þig þekkjum að þú vandar alltaf orð þín. Takk annars elsku vinkona fyrir gott og mjög upplýsandi viðtal á RÚV. Nauðsynlegt að ná þessu máli úr skotgröfunum, greina og ræða málefnalega.“
En allt er gott sem endar vel og Kristrún er sátt við Andrés sem baðst afsökunar sem var stórmannlegt af honum.