Engar áramótabrennur verða þetta árið er kemur fram á vef Reykjavíkurborgar. Framkvæmdaráð almannavarnanefndar höfuðborgarsvæðisins tók ákvörðun um að aflýsa brennum á höfuðborgarsvæðinu vegna sóttvarnaaðgerða.
Þar kemur fram fjöldatakmarkanir miðist nú við 50 manns og harma þau þessa ákvörðun sem komi eflaust til með að valda fólki vonbrigðum.
Í tilkynningunni segir;
„Ákvörðunin var tekin í ljósi þess að núverandi fjöldatakmarkanir vegna sóttvarnaaðgerða miðast við 50 manns og mikið er um smit í samfélaginu. Þrátt fyrir að áramótabrennur fari fram utandyra þá draga þær að sér fjölda fólks og það er mikilvægt að sveitarfélögin hvetji ekki til hópamyndunar við þessar aðstæður.
Sveitarfélögin átta sig á því að þessi ákvörðun getur valdið vonbrigðum en það er mikilvægt að vinna að því saman að fækka smitum, meðal annars með því að forðast mannmergð og leggja áherslu á fagna hátíðunum í minni hópum.“