Einn besti körfuboltamaður Íslands, bakvörðurinn Dagur Kár Jónsson, hefur nú yfirgefið KR og gengið til liðs við sitt gamla uppeldisfélag, Stjörnuna.
Samkvæmt fréttatilkynningu var ákvörðunin sameiginleg.
Dagur Kár lék tíu leiki fyrir KR á þessu tímabili; skilaði 18 stigum og 4 stoðsendingum að meðaltali í leik, og ljóst að missir KR er mikill, en gamla stórveldið er um þessar mundir í bullandi fallbaráttu.
Kynslóðaskipti eru í gangi hjá KR eftir langt velgengnistímabil þar sem liðið hampaði meðal annars Íslandsmeistaratitlinum sex ár í röð, árin 2014 til 2019.
Borið hefur á umræðu um fjárhagsvandræði hjá KR og mál fyrrum leikmanns liðsins, Kristófers Acox, var sem olía á þann eld.
Þá hefur ekkert gengið né rekið í útlendingamálum liðsins; hver útlendingurinn á fætur öðrum kemur og fer og ekkert gengur.
Og nú er Dagur farinn.
Staða KR í körfuboltanum í dag er slæm – liðið berst erfiðri barátta á mörgum vígstöðvum og það bendir margt til þess að svo gæti farið að stórveldið KR leiki í næstefstu deild á næsta tímabili.