Eiginnöfnin Svarthöfði og Bond voru samþykkt af Mannanafnanefnd á dögunum en nefndin hafnaði eiginnafninu Gunnarson.
Þann 11. ágúst síðastliðinn úrskurðaði Mannanafnanefnd um þó nokkurn fjölda umsókna á mannanöfnum. Fyrir utan Svarthöfða og Bond voru kvenmannsnöfnin Kvika, May og Lissie samþykkt sem eiginnöfn. Eiginnöfnin Blár og Apollo hlutu einnig náð nefndarinnar sem og millinafnið Dalland.
Nokkrum nöfnum var hafnað en má þar helst nefna millinöfnin Foss og Degen sem og millinafnið Octavius. Hins vegar var eiginnafnið Octavius samþykkt en ástæðan er sú að skilyrðin fyrir samþykki millinafna eru ekki þau sömu og skilyrðin fyrir eiginnöfn.
Knattspyrnumaðurinn knái, Sigurður Gísli Snorrason, þekktur sem Siggi Bond, leikmaður Þróttar Vogum í 2. deild karla, hefur undanfarið barist fyrir að fá að heita Sigurður Gísli Bond Snorrason en hefur ekki fengið þá ósk sína fyrr en nú.
Ekki náðist í Sigurð Gísla Bond við vinnslu þessarar fréttar.