Þeir sem fljúga með Play út í heim frá og með deginum í dag þurfa ekki að setja upp grímur um borð nema ef ferðinni er heitið til Frakklands eða Þýskalands. Grímuskylda verður einnig í fluginu til Bandaríkjanna ef að líkum lætur en þangað fer Play í sína fyrstu ferð þann 20. apríl.
Stjórnendur bandarískra flugfélaga hafa reyndar í vikunni biðlað til yfirvalda um að fella niður grímuskyldu í samgöngum þar í landi.
Með þessari breytingu hjá Play í dag þá getur stór hluti þeirra farþega sem flýgur til og frá Keflavíkurflugvelli setið í þotunum án grímu. Icelandair felldi nefnilega niður grímuskylduna í sínum ferðum í fyrradag nema ef flogið er til Frakklands, Sviss, Bandaríkjanna eða Kanada.
Að sama skapi eiga farþegar í Íslandsflugi British Airways að geta sleppt því að setja upp grímur.