Sprengjuhótanir bárust í tvo leikskóla í Reykjanesbæ, auk Ráðhússins í morgun en ekki þótti ástæða til að rýma þá.
Sjá einnig: Hóta að sprengja upp ráðhúsið í Keflavík: Hundrað starfsmenn yfirgáfu vinnustaðinn
Sjá einnig: Sprengjuhótun barst einnig leikskólanum Akri – Ekki þótti ástæða til að rýma húsið
Bæjarstjóri Reykjanesbæjar, Kjartan Már Kjartansson staðfesti þetta við Mannlíf rétt í þessu. „Já, það bárust sprengjuhótanir á tvo leikskóla sem voru svipaðar og þær sem bárust ráðhúsinu. Eftir ráðfærslu við lögreglu þótti ekki ástæða til að rýma skólana. Annars held ég að við höfum brugðist vel við með því að rýma Ráðhúsið en ég hef svo sem aldrei lent í því að fá sprengjuhótun áður en ég held að það sé vissara að hafa vaðið fyrir neðan sig. Við munum funda með lögreglunni eftir helgi og fara yfir málið.“
Aðspurður sagðist hann ekki vita hvort lögreglan hefði einhvern grunaðan en taldi að hún væri að rannsaka málið á fullu.
Ekki náðist í lögregluna á Suðurnesjum við gerð fréttarinnar.