Lögregla handtók karlmann seint í gærkvöld vegna líkamsárásar. Maðurinn var ekki viðræðuhæfur sökum ölvunarástands og var því látinn gista í fangaklefa lögreglu þar til runnið er af honum. Tæpri klukkustund síðar óskaði leigubílstjóri eftir aðstoð lögreglu eftir að farþegi veittist að honum og olli skemmdum á bifreiðinni. Sá var einnig látinn gista í fangaklefa lögreglu en aðilinn var undir áhrifum vímuefna.
Klukkan korter yfir eitt í nótt gaf lögregla ökumanni bifreiðar merki um að stöðva akstur svo hægt væri að kanna með ástand og réttindi. Ökumaðurinn virti hinsvegar ekki stöðvunarmerki lögreglu og upphófst þá eftirför. Maðurinn ók á ofsahraða og endaði utan vegar en litlu mátti muna að bifreiðin endaði inn í garði. Þá tók ökumaðurinn á rás en var á endanum hlaupinn uppi af lögreglu og handtekinn. Maðurinn reyndist vera eftirlýstur hjá lögreglu vegna annara mála auk þess að vera grunaður um akstur undir áhrifum vímuefna. Þá sinnti lögregla einnig umferðareftirliti og stöðvaði nokkra vegna gruns um ölvunarakstur.