„Ég og bróðir minn vorum á róló, akkúrat að borða nesti þegar það kom kona og talaði við fóstruna og okkur var sagt að fara inn í bíl. Við þekktum þessa konu ekki og ég man að ég spurði hvort ég mætti klára að borða, hef alltaf verið matargat. Þennan dag fórum við í fóstur á Blönduós og fórum ekki aftur heim til foreldra okkar.“ Hún er fædd á Akureyri en þegar hún var fjögurra ára var hún send í fóstur segir Hilma Dögg í hlaðvarpinu Sterk saman í umsjón Tinnu Guðrúnar Barkardóttur.
Hilma segist hafa verið heppin með fósturforeldra sem enduðu á því að ættleiða hana. Hilma hefur átt í töluverðum erfiðleikum með vímuefni í gegnum tíðina, en hefur verið í bata frá óreglu í tólf ár. „Í dag er sonur minn að verða 18 ára og á sjálfur í erfiðum vímuefnavanda, sá vandi byrjaði þegar hann var 12 ára gamall.“
Síðasta ár er búið að vera erfitt
Hilma er nýlega skilin við föður yngsta sonar síns. „Þetta síðasta ár er búið að vera erfitt, ég viðurkenni það, lífið gerist þó maður sé edrú,“ segir hún og bætir við:
„Ég á tvo fyrirbura, dóttir mín kom níu vikum fyrir tímann og svo kom yngsti fjórtán vikum fyrir og er með CP, svo það eru ýmis verkefnin. Þó svo ég eigi fatlað barn þýðir samt ekki að vandamál annarra sé eitthvað minna skilurðu.“
Aðspurð hvernig hún hafi náð utan um allt þetta, segir hún: „Ég var komin með pilluglas heim og farin að horfa ofan í það. Ég var að skilja, ein með krakkana, í námi, áhyggjur af elsta stráknum mínum alveg að fara með mig, hann hvarf reglulega en ég mátti ekki láta neinn sjá að það væri eitthvað að.“
Reyndi að flýja sársaukann með drykkju
Hilma segist hafa verið erfiður krakki og oft mjög reið. Þegar hún var 16 ára byrjaði hún að drekka áfengi, sem hafi fljótlega undið upp á sig. Þegar hún er um 17 ára var hún beitt kynferðislegu ofbeldi og áfengisneyslan jókst til muna. Hún segist hafi reynt að flýja sársaukann með drykkju.
Í dag er Hilma 41 árs þriggja barna móðir og segir að líf án vímuefna hafi verið upp og niður. Hún hefur klárað einkaþjálfaranámið og finnur að lífið sé að verða betra.
Kynntist barnsföðurinum í meðferð
„Ég fór ung í meðferð, þar kynntist ég nýju fólki, ég sá að ég ætti fullt eftir. Ég fór í margar meðferðir og í einni þeirra kynntist ég fyrsta barnsföður mínum. Það er ekki mælt með því en á þeim tíma var það gott fyrir mig, það leið ekki á löngu þar til ég varð ólétt.“
Hilma náði að vera edrú um tíma, en féll inn á milli, þegar sonur hennar var ungur. Hún hélt á þeim tíma að það væri nóg að hætta neyslu en að hún þyrfti ekki að vinna í líðan sinni á sama tíma.
Sonur minn er í neyslu
„Í dag er sonur minn að verða 18 ára og á sjálfur í erfiðum vímuefnavanda, sá vandi byrjaði þegar hann var 12 ára gamall,“ segir hún.
Aðspurð segir Hilma mun erfiðara að vera aðstandandi og vita af barninu sínu úti í neyslu.
„Ég fæ aðstoð frá kerfinu núna en bara þar til hann verður 18 ára. Ég er samt heppin með hann, hann skilur mörkin sem ég set og verð að setja því ég er með tvö önnur börn á heimilinu og því er ekki í boði að hafa einstakling í virkri neyslu þar.“
Fær símtal sem ekkert foreldri vill fá
Hilmu var farið að líða mjög illa þegar hún leitaði til í vinkonu sinnar eftir hjálp. Vinkonu hennar var brugðið þegar hún heyrði í henni og fór með hana beint á bráðamóttökuna.
„Ég var búin að gráta stanslaust og gat ekki hætt. Mér fannst samt erfitt að fara á geðdeild því ég var ekki fallin en samþykkti á endanum að leggjast inn, sem betur fer.“ Hilma var inn á geðdeild í tvær vikur og var búin að ná upp styrk. Hún ákveður að fara norður til fjölskyldu sinnar rétt fyrir páska, þegar hún fær símtal sem ekkert foreldri vill fá.
„Ég var komin norður þegar ég fæ símtal frá gjörgæslunni að sonur minn sé þar og ekkert sé vitað hvernig það fari. Ég sest aftur upp í bíl og keyri í bæinn, sit við hliðina á honum í viku og klára verkefnin í skólanum og læri fyrir próf.“
HÉR er hægt að hlusta einlægt og fallegt viðtal við Hilmu í heild sinni.