Árið 1990 tók hópur mótmælenda sig til og mótmæltu brottför ferðahóps Íslendinga til Suður-Afríku í Flugstöð Leifs Eiríkssonar, með því að syngja söngva að hætti Bantu-fólksins.
Aðskilnaðarstefnan var alls ráðandi í Suður-Afríku allt þar til minnihlutastjórnin í landinu afnam hana árið 1994. Fjórum árum áður hóf ferðaskrifstofan Veröld að fljúga hópum frá Keflavík til Suður-Afríku en slíkt hugnaðist ekki öllum. Hópur sem kallaði sig Suður-Afríkusamtök gegn aðskilnaðarstefnu stóð fyrir mótmæli í Flugstöð Leifs Eiríkssonar þegar fyrsti hópur Veraldar mætti til vegabréfsáritunar, á leið sinni til Suður-Afríku. Sungu mótmælendurnir söngva að hætti Bantu-fólksins í Suður-Afríku og settust á gólfið í tilraun sinni til að hindra för ferðalanganna. Einn forsvarsmanna hópsins, Sunna Snædal sagði það „siðlaust“ hjá Veröld að bjóða upp á ferðirnar og að ferðafólkið væri með þessu að styðja við aðskilnaðarstefnuna. Hvítur Suður-Afríkubúi reiddist mótmælendunum og sagði önnur Afríkuríki eiga það verr en mótmælendurnir gáfu lítið fyrir það.
DV fjallaði um málið á sínum tíma en fréttina má lesa hér fyrir neðan. Athugið að orðavalið í fréttinni litast af tíðarandanum árið 1994 en hefur sem betur fer breyst.
Negrasöngur S-Afríkusamtaka í Keflavlk í morgun:
Reyndu að hindra ferðamenn við vegabréfaskoðun
– hópur Íslendinga lagði af stað áleiðis til S-Afríku
Hópur fólks kyrjaði negrasöngva að hætti bantúnegra í Flugstöð Leifs Eiríkssonar í morgun til að mótmæla brottför ferðahóps íslendinga sem voru að leggja af stað áleiðis til Suður-Afríku. Mótmælendur settust á gólfið við vegabréfsskoðun og reyndu að hindra farþega í að ganga í gegn. Flugverðir þurftu að stugga fólkinu í burtu. Ekki kom þó til teljandi átaka. Hópurinn nefnist Suður-Afríkusamtök gegn aðskilnaðarstefnu. „Við erum að mótmæla skipulögðum hópferðum Veraldar til Suður-Afríku. Þetta var auglýst fyrst fyrir einum mánuði og fyrsti hópurinn er að fara núna. Við mótmælum brottfór fólksins,“ sagði Sunna Snædal, einn forsvarsmanna mótmælenda, í samtali við DV í morgun. „Þetta er siðlaust. Í fyrsta lagi er fólkið að styðja við bakið á aðskilnaðarstefnunni með því að versla við flugfélög sem fljúga til Suður-Afríku og styrkja yfirvöld. Auk þess er ólöglegt fyrir farþegana að taka með sér muni þaðan þar sem viðskiptabann ríkir við Suður-Afríku. Það er ekki vafamál að ferðafólkið mun taka slíkt með sér heim,“ sagði Sunna.
Hún segir að samkvæmt upplýsingum frá utanríkisráðuneytinu sé ekki ólöglegt að koma með muni frá Suður-Afríku þar sem slíkt stangast á við ferðafrelsi einstaklinga. „Við vitum að ef eitthvað kemur fyrir ferðamennina er ekkert sendiráð frá Norðurlöndum í landinu. Ef fólkið verður rænt eða brotið á því eiga íslendingarnir engan að og eru algjörlega á eigin ábyrgð. Við höfum setið og sungið baráttusöngva á bantúmáli – sömu lög og negrar syngja við sín mótmæli. Við settumst fyrir framan vegabréfsskoðunina en vorum færð þaðan,“ sagði Sunna. Hún sagði að viðbrögð farþega hefðu verið á þá leið að flestir létu sem þeir heyrðu ekki söngvana. Hvítur Suður-Afríkumaður varð reiður og benti fólkinu á að önnur ríki í Afríku væru verr stödd. „Ég get ekki séð hvað það kemur málinu við þegar við erum að berjast gegn mannréttindabrotum í hans landi,“ sagði Sunna Snædal. Ferðalangarnir áttu að fara með flugvél klukkan hálf níu til London.