Illugi Jökulsson, rithöfundur, ætlar að byrja nýja árið af krafti. Í færslu á Facebook síðu sinni segist hann vera alltof þungur, og að hann ætli að missa 50 kíló á einu ári. Hann er ekki ákveðinn í því hvernig hann ætli fara að þessum breytingum en virðist þó hafa einhverjar hugmyndir.
„Aðvörun: Hér fylgir status um mína eigin heilsu, sem kemur vissulega engum við nema sjálfum mér og mínum nánustu, en ég ætla samt að birta til að veita mér svolítið aðhald. Ég er semsé alltof þungur og nú dugar það ekki lengur. Fjöldi fólks lifir að vísu góðu lífi og við hestaheilsu þó það sé „of þungt“ samkvæmt skilgreiningu, en það gildir ekki í mínu tilfelli lengur. Til þess er ég of hjartveikur, kæfisvefninn of harður og hnén farin að erfiða of mikið. Ég ætla því að losa mig við 50 kíló næsta árið og verða sem næst 83 kílóum um næstu áramót. Það þýðir 1 kíló á viku, sem ætti að vera hægt, nema hvað síðsumars – þegar ég verð búinn að skila til prentunar bók um Skaftárelda og móðuharðindi – er stefna tekin á Marokkó í 2 vikur, og ég ætla að leyfa mér að léttast ekki þær vikur! Þá er spurningin, hvernig ætla ég að fara að þessu? Það veit ég varla ennþá. Ég gæti tekið upp á ýmsu. En þó veit ég að strax í dag hefst Plan A og það mikilvægasta: Borða minna“