Margir lántakar huga að því að festa vexti á lánum sínum vegna ótta við miklar vaxtahækkanir sem liggja í loftinu. Getur það reynst verulega kostnaðarsamt og munurinn hlaupið á fleiri hundruð þúsundum á ári.
Á fasteignalánum er í boði að festa vexti en það þýðir að vextir lánsins haldast óbreyttir á gildistíma þeirra. Ýmist er í boði að festa vexti í þrjú eða fimm ár. Margir lántakar velta því fyrir sér hvort rétt sé að endurfjármagna eða breyta lánunum. Enginn getur svarað hversu mikið eða hversu lengi vextir eiga eftir að hækka. Fastvaxtalán er valmöguleiki fyrir lántakendur sem vilja minnka mögulegar sveiflur og draga úr óvissu, þó þeir geti endað á að greiða meira.
Einstaklingur er með 30 milljón króna óverðtryggt íbúðalán á breytilegum vöxtum sem í dag eru 5,4%. Hann ákveður að festa vexti í 3 ár. Fastvaxtalán hjá Landsbankanum bera í dag í kringum 6,7%.
Að öllu óbreyttu greiðir einstaklingurinn hærri afborgun á mánuði. Afborgun láns með breytingum vöxtum er 152.815 kr á meðan afborgun fastvaxtalánsins er 180.049 kr. Er því mismunurinn afborgana þessara tveggja lána 27.234 krá mánuði eða 326.808 kr á ári.
*Nýtt íbúðalán, miðað við vaxtatöflu bankans 16. júní 2022
Greiðir fyrir að borga hærri vexti
Miðað við gjaldskrá Landsbankans er rukkað 19.900 kr í gjald fyrir að festa vextina, auk 2.500 kr þinglýsingargjalds. Kostnaðurinn við að breyta yfir í fastvaxtalán er samtals 22.400 kr. Vert er að nefna að uppgreiðslugjald er á fastvaxtalánum. Hjá Landsbankanum er uppgreiðslugjaldið 0,2% af eftirstöðvum höfuðstólsins, fyrir hvert ár sem eftir er af tímanum.
Einstaklingur með 30 milljón króna fastvaxtalán vill færa sig aftur í breytilega vexti eftir eitt ár af þriggja ára gildistíma fastvaxtalánsins.
Uppgreiðslugjaldið væri því (0,002 x 30.000.000) = 60 þúsund x 2 ár. Samtals 120.000 kr
Húsnæðislán með breytilegum vöxtum eru ekki með uppgreiðslugjaldi.
Á síðu Landsbankans má finna frétta- og fræðsluefni fyrir neytendur.