Minkurinn er með slægari kvikindum þessa lands og ekki margir sem væru til í að mæta slíku rándýri á förnum vegi. Fimm ára sonur Kolbeins Sigurðssonar bónda á Hvítárholti var algjörlega grunlaus einn morguninn árið 1985 er hann hugðist nývaknaður ætla að pissa í klósettið. Upp úr klósettinu spratt það sem pilturinn taldi vera rottu. Hljóp hann til föður síns með fréttirnar sem réðist snögglega til atlögu en rottan reyndist vera minkur.
DV sagði svo frá á sínum tíma:
Minkur kom upp um klósettið á bænum Hvítárholti:
Stökk á mig og læsti kjaftinum um höndina
Minkur kom upp um klósettskálina á bænum Hvítárholti í Hrunamannahreppi í gærmorgun. Fimm ára sonur bóndans varð kvikindisins fyrst var, stráksi var þá nývaknaður og lallaði sér eins og gengur inn á klósett til að pissa. Kominn inn sá hann hvar minkurinn skaust á bak við ofn, hélt hann að þar væri rotta á ferð. Strákurinn þaut strax út og skellti hurðinni á eftir sér. „Hann kom hlaupandi til okkar i svefnherbergið og hrópaði að það væri rotta inni á salerni,” sagði Kolbeinn Sigurðsson, bóndi á Hvítárholti, í gær. „Við vorum svona rétt að vakna. Ég dreif mig fram úr og klæddi mig, fór síðan í vaðstígvél og setti þykka leðurhanska á hendurnar. Eftir það var ekki annað að gera en fara inn og ráðast til atlögu. Minkurinn var þá í sturtubotninum. Ég æddi á móti honum. Hann gargaði á móti mér og stökk á mig og læsti kjaftinum utan um höndina.” Kolbeinn náði góðu taki á minknum. Að því loknu óð hann með minkinn út á hlað og drekkti honum í vatnsfötu.
Minkurinn hefur örugglega komiö upp um klósettskálina?
„Já, það voru greinileg verksummerki þar, sandur á botninum, för og hár af honum ofar í skálinni.” Kolbeinn kvaðst ekki hafa meiðst í átökunum við minkinn, leðurhanskarnir hefðu séð fyrir því.
Og þú hefur drekkt honum?
„Það var ekki annað að gera þó ég sé ekki vanur minkabani.”