Ölvun og slagsmál eru orð næturinnar. Talsverður erill var hjá lögreglunni á höfuðborgarsvæðinu samkvæmt dagbók hennar.
Rétt fyrir eitt í nótt var tilkynnt um mann í miðbæ Reykjavíkur sem hafði verið að hrækja á dyraverði. Þegar lögreglu bar að neitaði hann að segja til nafns og lét öllum illum látum. Var hann vistaður í fangageymslu þar til hægt verður að ræða við hann.
Á svipuðum tíma barst lögreglu tilkynning um blóðugan mann á gangi í vesturbæ Reykjavíkur en maðurinn var farinn þegar lögreglan kom á vettvang. Klukkan 3:14 barst tilkynning um slagsmál fyrir utan skemmtistað í miðborginni. Lögreglan mætti á vettvang og verður vitni að áframhaldandi líkamsárás sem varð til þess að tveir aðilar voru handteknir og gista nú fangageymslu í þágu rannsóknar málsins.
Pöddufullur einstaklingur hótaði að stinga annan vegna deilna þeirra á milli en lögreglan fékk tilkynningu um málið klukkan 3:19. Reyndist maðurinn óvopnaður en sótölvaðu og ekki líklegur til ofbeldis. Málið er í rannsókn.
Laust eftir klukkan fjögur í nótt var tilkynnt um ölvaðan mann sem var að reyna að komast inn í byggingar í miðbæ Reykjavíkur, líklega í leit að skjóli. Var maðurinn fluttur á lögreglustöð eftir að í ljós kemur að maðurinn er of ölvaður til að sýsla með sín mál. Lögreglan bauð honum gistingu í fangageymslu sem hann þáði með þökkum.
Á svipuðum tíma réðust nokkrir aðilar á einn í miðborginni en árásarþoli var ekki mikið slasaður. Lögreglan leitar nú að árásaraðilunum og er með málið í rannsókn.
Rétt eftir klukkan fimm var ökumaður stoppaður grunaður um akstur undir áhrifum áfengis. Í ljós kom að ökumaðurinn hafði aldrei orðið sér úti um ökuréttindi. Var honum sleppt eftir hefðbundið ferli.
Lögreglunni sem annast Garðabæ og Hafnarfjörð barst tilkynning kortér yfir eitt í nótt um aðila sem reyndu að komast inn í sjálfsafgreiðsluvél á bensínsstöð en þjófarnir fóru tómhentir af vettvangi þar sem þeim tókst ekki að brjóta upp vélina.
Nokkuð var um að lögreglan hafi stöðvað ökumenn vegna gruns um akstur undir áhrifum á öðrum svæðum höfuðborgarsvæðisins.