Sjö ára drengur fór að heiman sunnudaginn 24. júní árið 1990, til að leigja sér spólu á myndbandaleigu við Langholtsveg. Um miðnætti var hann ekki enn kominn heim.
Baksýnisspegill kvöldsins fjallar um lítið en forvitnilegt mál þar sem sjö ára gamall strákur týndist eftir að hafa ætlað að leigja sér myndbandsspólu á leigu við Langholtsveg í júní 1990. Eftir að foreldrar hans höfðu samband við lögreglu. þegar hann skilaði sér ekki aftur, hófst mikil leit. Um klukkan þrjú um nóttina var sporhundur kallaður til við leitina. Hin mikla leit bar þó engan árangur en um klukkan hálf sex morguninn eftir bankaði sá stutti upp á í húsi við Kötlufell í Breiðholti. Sagðist hann hafa sofið nærri bóndabæ við Elliðarárdalnum.
DV fjallaði um málið en fyrir neðan má lesa fréttina.
Mikil leit í Reykjavík:
Sjö ára strákur svaf úti í nótt
Mikil leit var gerð í nótt að sjö ára dreng sem á heima í Álfheimum í Reykjavík. Drengurinn fór að heiman í gærkvöld og ætlaði á myndbandaleigu við Langholtsveg. Þegar hann var ekki kominn heim um miðnætti höfðu foreldrar hans samband við lögreglu. Mikil leit hófst þá að drengnum. Sporhundur kom til hjálpar um klukkan þrjú í nótt. Þrátt fyrir mikla leit fannst drengurinn ekki. Það var svo um klukkan hálfsex í morgun að hann bankaði upp á í húsi við Kötlufell í Breiðholti. Hann bað heimilisfólkið þar að hringja heim til sín og láta vita af sér. Drengurinn gaf þær skýringar að hann hefði gengið upp með Elliðaám og upp Elliðaárdalinn. Hann segist hafa sofið nálægt einhverjum bóndabæ. Þegar hann vaknaði gekk hann að nærliggjandi húsi og bað um að hringt yrði heim til sín.