Þórður Snær Júlíusson, ristjóri Kjarnans, á von á því að verða yfirheyrður af lögreglu í dag vegna meintra brota gegn Páli Steingrímssyni, skipstjóra og meðlimi í skæruliðasveit Samherja. Ritstjóranum er gefið að sök að hafa haft undir höndum og mögulega dreift kynlífsmyndböndum úr símanum sem voru af skipstjóranum sjálfum.
Í gær vísaði Landsréttur frá kæru Aðalsteins Kjartanssonar, blaðamanns Stundarinnar, um að lögreglunni hafi verið óheimilt að taka skýrslu af honum sem sakborningur. Aðalsteinn, sem furðar sig á því að Landsréttur hafi ekki tekið efnislega afstöðu í máli, hyggst kæra þetta áfram til Hæstaréttar.
Eins og staðan er í dag á að yfirheyra Þórð og Arnar Ingólfsson samstarfsmanns á Kjarnanum. Ritstjórinn tjáir sig um málið á Twitter:
„Jæja, þá á ég að fara í yfirheyrslu sem sakborningur fyrir glæp sem enginn kærði, ekkert liggur fyrir um að hafi verið framinn og ég hafði ekki hugmyndaflug til að ímynda mér fyrr en ég las um í glórulausri greinargerð staðgengils lögreglustjórans. Hresst,“ segir Þórður og bætir við:
„Einsdæmin í þessum farsa eru að verða ansi mörg. Aldrei áður hefur jafn miklu púðri verið eytt í kæru á símastuldri sem í ofanálag einhver er búinn að játa á sig. Og ég man ekki til þess að lögregla sé að birta stærilætisfréttir um niðurstöðu dómstóla um réttmæti rannsókna.“