Borgari hafði samband við lögreglu í gærkvöldi og tilkynnti um ætluð fíkniefna á stigagangi fjölbýlishúss í miðborginni. Lögreglan mætti á vettvang og lagði hald á efnin. Kemur þetta fram í dagbók lögreglunnar á höfuðborgarsvæðinu.
Tilkynning barst einnig lögreglu vegna yfirstandandi hópslagsmáls í mathöll í miðborginni. Reyndust slagsmálahundarnir vera nokkrir aðilar undir lögaldri og því málið unnið áfram með barnavernd og er málið enn í rannsókn.
Þá voru tveir ökumenn í miðbæ Reykjavíkur handteknir grunaðir um akstur undir áhrifum fíkniefna. Voru þeir fluttir á lögreglustöð í hefðbundið ferli og sleppt að því loknu.
Lögreglan sem þjónustar Hafnarfjörð, Álftanes og Garðabæ handtók aðila grunaðann um sölu og dreifingu fíkniefna en málið er í rannsókn.
Lögreglan sem sinnir verkefnum í Kópavogi og í Breiðholti stöðvaði ökumann við hefðbundið umferðareftirlit. Blés hann undir refsimörkum og var gert að hætta akstri samstundis.
Tveir menn veittust að saklausum hundaeiganda sem var á gangi með hvutta og rændu hann verðmætum. Ekki kemur fram í dagbókinni hvar þetta gerðist en lögreglan sem sinnir Árbænum, Grafarholtinu, Grafarvoginum, Norðlingaholtinu, Mosfellsbænum, Kjósarhreppinum og á Kjalarnesinu var kölluð til. Málið er í rannsókn.