Fæstir botna í ákvörðunum Jóns Gunnarssonar dómsmálaráðherra undanfarna mánuði. Jón er bráðabirgðaráðherra og á að rýma fyrir Guðrúnu Hafsteinsdóttur á næstunni, ef marka má Bjarna Benediktsson, formann Sjálfstæðisflokksins og ábyrgðarmann Jóns.
Jón hefur, með dyggri aðstoð Brynjars Níelssonar aðstoðarmanns síns, látið til sín taka undanfarið og er greinilegt að hann ætlar að valda sem mestum usla. Útlendingamál hans hafa einkennst af vilja til þess að koma sem flestum úr landi aftur. Rafbyssuvæðing lögreglunnar er uppátæki sem margir fordæma.
Jón er augljóslega í ruglinu í ráðuneyti sínu. Síðasta uppákoman í málefnum Jóns er að hann ræðst að Landhelgisgæslunni og fyrirskipar sölu á einu helsta öryggistæki stofnunarinnar, flugvélinni TF-SIF. Jón er fordæmdur af pólitískum andstæðingum, samherjum og nánast öllum þeim sem málið varðar. Georg Lárusson, forstjóri Gæslunnar, hefur talið það feigðarflan að selja flugvélina. Meira að segja Björn Bjarnason, samherji Jóns og fyrrum dómsmálaráðherra, hefur risið gegn ráðherranum og telur það vanhugsað að selja vélina eftir að Gæslan hefur haldið úti slíkri þjónustu í 70 ár.
Þess er að vænta að Jóni verði skipt út innan skamms tíma áður en meiri skaði verður af störfum hans …