Heimildir Mannlífs herma að maðurinn sem skotinn var af lögreglu á Egilsstöðum sé kominn af gjörgæslu og er á batavegi.
Rannsókn málsins er í fullum gangi og vildi lögregla ekkki tjá sig um stöðu málsins á þessum tímapunkti.
Maðurinn sem var skotinn gekkst undir skurðaðgerð eftir að hann var fluttur frá Egilstöðum á Landspítalann.
Mál þetta er um margt einstakt; sérstaklega þar sem þetta er í fyrsta sinn sem almennur lögregluþjónn þarf að beita skotvopni við störf á Íslandi.
Eins og staðan er nú er málið í algjörum forgangi hjá embætti héraðssaksóknara en búið er að yfirheyra þó nokkra vegna málsins.
Málsatvik voru þau að á fimmtudagskvöld heyrðu íbúar við Dalsel á Egilsstöðum marga skothvelli, og létu lögreglu vita.
Karlmaður á fimmtugsaldri fór að heimili annars manns, sem ekki var heima hjá sér, og skaut ítrekað af skotvopni eða skotvopnum í allar áttir. Maðurinn var vopnaður haglabyssu og riffli.
Mikið hættuástand skapaðist en skömmu áður en skothríðin hófst voru börn á ferli nálægt skotstaðnum, en þau náðu að flýja út í skóg og biðu þar þangað til skothvellirnir hættu endanlega.