Neytendastofa sektaði Heimkaup um 400 þúsund krónur. Sektin skal greiðast innan þriggja mánaða.
Neytendastofa gerði nýverið athugasemdir við auglýsingar Heimkaupa þar sem auglýstur var Tax Free-afsláttur án þess að prósentuhlutfall afsláttarins væri tekið fram. Neytendastofa hefur áður bannað Heimkaup að auglýsa Tax Free-afslátt með þessum hætti .
Í svari Heimkaupa kom fram að um mistök hafi verið að ræða og að félaginu væri kunnugt um að geta þurfi prósentuhlutfalls afsláttar þegar orðin „Tax Free“ séu notuð en í þetta sinn hafi það gleymst.
Í ljósi þess að Heimkaup hafi brotið gegn fyrri ákvörðunum Neytendastofu, árið 2015, taldi stofnunin nauðsynlegt að sekta félagið. Var því lögð 400.000 kr. stjórnvaldsekt á Heimkaup fyrir brotið.
„Sektina skal greiða í ríkisjóð innan þriggja mánaða frá dagsetningu ákvörðunarinnar,“ segir í ákvörðun Neytendastofu.
Nánar um þessa ákvörðun Neytendastofu hérna.