Enn er ekki víst að Ingó Veðurguð muni stjórna brekkusöng á Þjóðhátíð í Vestmannaeyjum, en ef af verður yrði þetta níunda árið í röð sem hann stjórnar frægasta brekkusöng Íslandssögunnar.
Samkvæmt áreiðanlegum heimildum Mannlífs er talið ólíklegt að Ingó muni sjá um brekkusönginn í Eyjum þetta árið, en of snemmt er að fullyrða að svo verði.
Eins og staðan er nú vill enginn sem kemur nálægt málinu beint eða óbeint staðfesta við blaðamann Mannlífs að Ingó verði ekki með brekkusönginnn, en einn orðaði það svo að honum þætti það ólíklegt. Allir sem blaðamaður ræddu við vildu ekki tjá sig opinberlega um ástæðu þess að ÍBV vilji ekki segja af eða á hvort Ingó haldi starfinu.
Í samtali við Fréttablaðið sagði Ingó að hann væri í samningaviðræðum við þjóðhátíðarnefnd; það væri ekki enn staðfest hvort hann verði í brekkunni um verslunarmannahelgina eður ei.
Sjálfur er Ingó bjartsýnn að hann fái áfram að feta í fótspor hins goðsagnakennda Árna Johnsen og segir í áðurnefndri frétt Frétttablaðisns:
„Mér finnst það allavega mjög líklegt. Þetta er alltaf skemmtilegasta giggið á árinu og vonandi horfa bara allir á þetta,“ og bætir við:
„Samningaviðræður eru enn í gangi“ en þar á Ingó við samningaviðræður við ÍBV sem hefur enn ekki viljað staðfesta hvort Veðurguðinn verði áfram stjórnandi brekkusöngsins.
Ingó mun hinsvegar stjórna brekkusöng á Írskum Dögum sem fara fram um helgina á Akranesi.
Þess má geta að tónlistarmaðurinn landsþekkti, Auður, boðaði komu sína á Írska Daga, en afboðaði sig síðan sjálfur vegna ásakana um kynferðisáreiti.