Skúli Gunnar Sigfússon, kenndur við Subway ber á Svein Andra Sveinsson lögmann þungum sökum og segir hann í raun kynferðisbrotamann og kvarta yfir spillingu en þeir hafa löngum eldað saman grátt silfur.
Skúli skrifaði harðorða færslu á Facebook á dögunum þar sem hann gagnrýnir spillingu í dómskerfinu. Við færsluna birtir hann ljósmynd af þeim Sveini Andra lögmanni og Benedikti Bogasyni, forseta Hæstaréttar, og sýnir myndin þá sitja saman á knattspyrnuleik.
Skúli skrifar: „Það er á vissan hátt táknrænt að vinirnir skelli sér saman á knattspyrnuleik á sama tíma og fárviðrið geisar í kringum KSÍ. Forseti Hæstaréttar Íslands mætir á völlinn með „meintum“ geranda eins og ekkert hafi í skorist.“
Skúli var eigandi félagsins Ek1923 sem varð gjaldþrota á sínum tíma en Sveinn Andri var skiptastjóri í félaginu. Miklar deilur kviknuðu hjá þeim sem að lokum enduðu fyrir dómstól. Því er óhætt að segja að það andi köldu þeirra má milli.
Skúli ber eins og áður segir þungar sakir á Svein Andra í færslunni en þar segir meðal annars:
„Reyndar er í mínum huga karl um fimmtugt sem sannanlega hefur ítrekað reynt að tæla unglingsstúlkur og haft samræði við unglingsstúlku(r), sem eru rétt rúmlega fermdar, ekki meintur gerandi — hann er ekkert annað en gerandi.“
Skúli Gunnar er hvergi nærri hættur í brigslyrðum sínum:
„Það kemur sér vel fyrir Svein Andra að eitt fórnarlamba hans er ekki lengur á meðal okkar og getur ekki tjáð sig um það sem hann gerði henni. Hún var ung móðir sem tók eigið líf eftir að Sveinn Andri hafði vísvitandi tælt hana til sín og borið í hana eiturlyf þegar hún var að koma úr meðferð og ætlaði að standa sig fyrir barnið sitt.“
Aukreitis segir Skúli að vinir Sveins Andra í dómsýslunni og Lögmannafélaginu hafi ekki einungis liðið hegðun hans heldur blátt áfram verðlaunan hann í formi „úthlutunar feitra þrotabúa,“ líkt og hann orðað það í færslunni.
Segir hann það duga að „nefna þrotabú EK 1923 ehf. þar sem Sveinn Andri mjólkaði um 170 milljónir króna út úr búinu með því að rukka um 50 þúsund krónur á tímann þar sem hann gat sjálfur ráðið tímafjöldanum. Þrotabúið fékk hann hjá vini sínum og fyrrum samstarfsfélaga, Lárentsínusi Kristjánssyni héraðsdómara.“
Þá talar Skúli Gunnar um Katríni Jakobsdóttur, forsætisráðherra og að hún hefði ítrekað komið fram og lýst yfir áhyggjum sínum yfir KSÍ málunum og hversu sorglegt það sé hve mikið þurfti til svo eitthvað yrði gert og að KSÍ þyrfti að taka fastar á þessum málum.
Síðan spyr Skúli:
„En hvað með dómstóla landsins? Er ekki mikilvægt að þar sé tekið fast á málum? Er ekki dapurlegt að þar er ekki einungis kynt undir kynferðislegu ofbeldi, heldur sé gerandi látinn hafa verkefni af vinum sínum sem færa honum hundruð milljóna í tekjur?“ Hann heldur svo áfram og segir að lokum „Enda eru dómararnir ósnertanlegir og ulla í raun framan í forsætisráðherra með því til dæmis að mæta með geranda á knattspyrnuleik. Enda getur forsætisráðherra eða aðrir ráðamenn ekki snert þá og virðast ekki hafa nokkurn áhuga á að reyna það.“
Hér er umfjöllun Stundarinnar frá árinu 2016 um Svein Andra og ungar stúlkur sem hann hefur verið í samskiptum við.
Mannlíf náði tali af Sveini Andra sem vildi lítið tjá sig um færslu Skúla, annað en þetta:
„Ég kannast við færsluna, en ég vil ekki tjá mig um hana.“