Steven Gerrard er einn besti fótboltamaður Englands fyrr og síðar; lék allan sinn feril með Liverpool og vann fjölda titla með liðinu. Hann var um langt árabil burðarás í enska landsliðinu.
Gerrard lítur á Everton, sem er staðsett í Liverpool, sem erkióvin sinn eftir erfiðar og margar viðureignir með Liverpool gegn bláklæddum Everton-mönnum.
Ástæðan fyrir því að Gerrard tjáir sig um Everton er sú að hann var orðaður við starf framkvæmdastjóra félagsins og var hissa á þeirri umræðu.
Í viðtali við ESPN segir Gerrard, sem er núverandi framkvæmdastjóri Glasgow Rangers í Skotlandi, að „Rafa (framkvæmdastjórinn Rafael Benitez sem var nýlega ráðinn til Everton og var stjóri hjá Liverpool þegar Gerrard var á toppi síns ferils) fæddist ekki í Liverpool; hann er ekki ekta Liverpool-maður. Rafa lék ekki gegn Everton í tuttugu ár, svo ég held að þetta séu allt öðruvísi aðstæður.
Rafa er sinn eigin herra og tekur eigin ákvarðanir og það er ekkert skrítið að hann hafi viljað þjálfa í ensku úrvalsdeildinni hjá stóru félagi; var ekkert hissa á þessu. En ég var mjög hissa að sjá að ég hafi verið orðaður við félagið; hvaðan það kom veit ég ekki,“ og klikkir út með þessum beinskeyttu orðum:
„Ég mun aldrei þjálfa Everton, hvorki nú né síðar, kemur bara alls ekki til greina.“